樓市出更：中區商廈租 睇跌半成
近幾年發展商為旗下中區舊式商廈重建增值，由今年起至最快一七年間，該區會有8個新增商廈項目，總樓面超過120萬方呎。不過，由於只有好少項目暫獲預租，加埋外圍經濟時好時壞，商廈租賃勢首當其衝，好多代理都唔睇好今年中區甲級商廈租金表現，有啲仲估上半年租金會跌最少5%。
雖然中區好耐都無商用官地賣，但好幾個發展商都密密手重建旗下區內舊商廈，加加埋埋未來幾年可提供逾120萬方呎樓面，喺依家該區商廈空置率回升到6.7%，屬近年新高水平下，加上歐美經濟仍麻麻哋，租金前景未許樂觀。
建行大廈預租反應差
舊年八月，建設銀行（00939）等嘅區內中國建設銀行大廈推出預租，意向呎租約150至160元，撞啱環球經濟低迷，預租市場反應未見熱烈。
劉Sir睇番戴德梁行資料，今年中區有個新建商廈應市，係皇后大道中31至37號重建項目，總樓面約8.67萬方呎。
至於華懋嘅德輔道中22號永安人壽大廈重建項目預計一四年可以推出，而同系德輔道中26號永安中區大廈重建項目擬一六年推出。重頭戲係太子大廈大型商廈重建項目，預計最快一七年可加入市場，項目將提供樓面約60.5萬方呎。
戴德梁行董事總經理陶汝鴻話，目前中區每月實質呎租只約104元，較○八年高位跌逾14%，區內商廈未來供應增加，加上外圍波動影響企業擴充，業主租金叫價有壓力，料上半年中區商廈租金有5%下調空間。
資策8.3億買旺角項目
踏入今年，商舖短炒獲利錄紅盤，張姓資深投資者摸出兩個商舖，其中以1.44億元摸出嘅大角咀埃華街67至83號一巨舖，約四個月帳面袋2,000萬元。
另外，德祥地產（00199）啱啱公布出售旺角彌敦道703及705號一項起緊嘅零售綜合大廈，作價8.3億元，買家係資本策略地產（00497）。
