股海實戰：恆大地產 上望5元關

今日係二○一三年首個交易日，阿莊祝願各位股友股場得意，身心康泰！美國財政懸崖問題最後一刻化解，DOW期勁升兩舊幾賀二○一三。政治市已成過去，展望今年，市場焦點將重投經濟金融課題。日本進入新一輪放水周期；美國同歐洲經濟復甦之路仍未明確，寬鬆貨幣政策有望延續；內地藉推動城鎮化保持經濟穩定增長，A股步入復甦之年。環顧全球局面，預計首季市底仍然偏好，缸邊友可以繼續揮動鑊鏟！

上周五阿莊買入推介嘅光大控股（00165），講到明本周一會食胡，遂以平均價14.94元沽出兩萬股。屈指一算，二○一二年阿莊個組合都升咗三成有多，跑贏大市，都算滿意！展望今年，首季策略會保持適度進取，但就提醒大家一句，熱錢有如大海浪潮，漲退總有時，一發現熱錢有流走迹象，就要毫不猶豫減倉以控制風險。

經濟復甦穩中求勝

A股舊年直頭係輸家食尾胡，全靠上月嚟個鯉魚翻身，滬綜指好不容易全年才有3%進帳。展望今年，無論站喺市場流動性、經濟復甦動力、以及國家政策等角度分析，今年總體情況將較舊年好，但期望之前爆升嘅時代重臨，則有點不切實際，取而代之應該係有實際經濟數據支持嘅健康升市。阿莊有感新一屆中央政府作風更加務實，且決心求變，以解決發展中所出現嘅各項問題，個別屬「既得利益」嘅板塊，如內銀股，最風光嘅時候已成過去，嚟緊主調離不開一個「穩」字。反觀券商股可望喺國策支持下蓬勃發展，上周便傳來證券投資基金法修訂通過、中證監擬允許券商等開展公募基金業務，相信扶持券商業發展嘅措施陸續有來，兩隻大型中資券商股中信証券（06030）及海通證券（06837），股價一回就要買！

有大行發表報告，話今年可以少睇本地地產股，轉睇內房股，皆因港樓價格喺政府出招以及供應不斷增加之下，難以大升；反觀內地城鎮化帶動住屋需求，只要內房股唔係追求暴利，有望實現價量齊升。

銷售成績提前達標

舊年不少銷售達標嘅內房股股價迭創五十二周高，但恒大（03333）卻仍相對落後，現價4.25元，同舊年二月底嘅高位5.03元仍有一段距離。舊年十二月初，公司披露首十一個月累計實現合約銷售額846億人仔，已提前完成全年銷售額800億人仔嘅目標。交得出銷售成績，股價仍相對落後，相信與高位蟹貨較多有關。

走勢上，舊年九月下旬見底回升以來，股價已形成一上升通道，本周一股價創五個多月嘅收市新高，短線關鍵在以大成交突破舊年六月下旬急跌前嘅水平，即重上4.5至4.6元區域，則試叩5元關指日可待，回吐未宜失守3.95元。