樓市出更：代理捱寒冬 搵食撈過界

政府出招，住宅物業交投急跌，佣金收入自然大減，難為一班地產代理，更市傳有代理行出現大量人手流失情況，要搵食維生，最後只好轉行。劉Sir聽到近排已經有部分住宅代理轉做保險，相反，新招對工商舖市場有「着數」，部分工商舖代理擺明搶做開住宅嘅代理，好似有間代理話早前就密密手請人，歡迎住宅市場同業加盟咁話。

住宅交投大跌，大藍籌屋苑有時一日都無一單刁，點養得起每區過百個代理。有地產代理經理同劉Sir呻，唔好話出糧，近排連交舖租、電費同水費都有問題，可以嘅話寧願間舖賣埋魚蛋幫補下，同事都要食飯，部分為生計惟有轉行。

入行初哥「兩樣」齊撈

佢又話，好似有班入行兩、三年嘅後生仔，呢排好多都轉行做保險，一來已經習慣靠佣金為生，唔靠底薪，二來都係靠把口搵飯食，搵番同一批客，唔sell樓轉sell保險；仲有班住宅代理實行「兩樣」一齊撈，實行多邊發展咁話。

至於另一班喺行內打滾多年，有番咁上下經驗嘅代理行家都慨嘆，其實呢班「老鬼」最難轉工，唔通要佢哋打番每月萬零蚊工咩！但時勢造英雄，佢哋好多時都寧願放長假，或做番之前嗰行。

舖市旺專攬住宅代理

相反，呢排工商舖旺爆，做到踢晒腳，所謂做生不如做熟，一班住宅代理即成招攬目標。康業物業代理有位姓張嘅老友同劉Sir講，佢公司現時大約有80個員工，比年初多咗一成，由於住宅買賣短期難有突破，所以佢哋轉做工商舖係大趨勢，其實唔少住宅代理都有一班有錢嘅投資客戶，唔買住宅，咪轉買工商樓，所以一早登廣告向呢班精英招手過檔。

利嘉閣（工商舖）地產董事黃應年（Roy）都話，佢公司唔主張撬番自己行嘅住宅代理過檔，不過就會考慮其他行家，但暫時實際獲取錄嘅人唔多。美聯工商舖（00459）行政總裁黃漢成（Daniel）話，現時公司員工逾700多個，比年初多咗約400人，當中佔多過八成有買賣住宅經驗。

但有位做工商舖物業買賣超過二十年嘅老友記同劉Sir講，由於工商舖物業存在唔少自建部分等灰色地帶，加上物業契約內容遠較住宅複雜，查實無想像中咁易做。