股海實戰：龍源電力上望6元關

港股尋日大部分時間偏軟，尾市卻止跌回升，反映市底仍偏強。滙控（00005）股價再創五十二周高81.8元，一線內房股似係調整完成，中海外（00688）、潤地（01109）均高收。未來兩個交易日（下周一平安夜僅半日市）大市成交可能轉靜，但除非外圍市況大幅波動，否則預期恒指可企穩喺10日線22,463點樓上，繼續矮仔爬樓梯，反覆向23,000點大關推進。

光伏股炒救市措施消息餘威未盡，尋日見隻陽光能源（00757）出現第二支大陽燭，收報0.57元，升16%。阿莊話想睇位買嘅興業太陽能（00750）就現回吐，好順利以均價6.73元買入2萬股。至於尋日品題嘅電池股，天能（00819）同超威（00951）僅微升，反觀較冷門嘅理士（00842）就升咗超過半成，反映依家炒家獨愛落後股。

新能源股續有異動

新能源股繼續異動，尋日輪到較細價嘅大唐新能源（01798）及華能新能源（00958），二者分別升4.4%及6.6%，人氣唔錯。環顧呢個板塊，仲未起動而又較細價嘅，有華電福新能源（00816）、中國風電（00182）同中電新能源（00735），可以關注吓。

講到新能源股，近期龍源（00916）嘅發展值得關注。事緣公司喺本月初公布發行4億美元5.25厘高級永續證券。作為一家新能源企業，能發行呢類永續證券並唔簡單。更令人意外嘅係，呢頭發債，嗰頭公司喺本月中旬宣布配售新H股，配股價5.08元，集資29億元。資料顯示，基金T.Rowe Price Associates喺本月十四日按平均價5.105元買入1.52億股，持股量由3.01%增至7.01%，咁大手貨，唔排除係喺場內及認購配售股份中增持，可見雖然公司短期內兩度集資合共約60億元，但基金熱情未減。

呢期新能源股蠢蠢欲動，阿莊估計同市場預期內地當局即將發布實施《可再生能源電力配額制管理辦法》有關，屆時風電行業將進入規範化、健康化發展軌道，更有利類似龍源呢類大企業嘅長遠發展。回說龍源嘅股價走勢，中線可反覆向上回補今年五月嘅下跌裂口（5.46至5.78元），直驅6元大關，4.7元水平支持不容有失。