樓市出更：巨鋪劏「碎」博賺近倍

年終將至，但「劏舖」潮持續。投資者尹柏權等再度出手，佢今年中斥近2.8億元購入嘅油麻地彌敦道534至538號地下3號舖，啱啱改咗名叫iMall 先域廣場，並會「劏細」成28個細舖出售，入場費850萬元，其中有一個400多方呎向街舖開價達8,320萬元，呎價要20萬元，相信係該區地舖呎價新指標，至於最細嘅舖只係有68方呎。

熱錢充斥市場，唔少散戶都想買磚頭保值，所以唔少地區都有「劏舖」出售情況，入場費幾百萬元有交易。有代理同劉Sir講，投資者尹柏權等今年五月用2.75億元買入嘅上述彌敦道地舖，面積約3,400方呎，呎價約8萬餘元，原本由連鎖內衣店租用，月租約25萬元。

850萬起 沽清可套4.9億

依家尹柏權將上址命名為iMall 先域廣場，仲劏咗28個地舖，建築面積由只約68至428方呎，每個可售面積大約係建築面積嘅一半，售價由850萬元起，呎價則由12.5萬元起，其中有個向街面積約416方呎舖，叫價8,320萬元，呎價20萬元，拍得住旺角一線街尾地舖做價。

睇番份銷售文件，今次有3個面積400幾方呎地舖，建議可再分間數個細舖出售，估計今次賣晒可套現逾4.9億元，帳面袋逾2億元。

近排唔少商舖同商場陸續劏售，其中同由尹柏權等今年購入嘅荃灣兩項零售物業，先後命名為荃立方及地皇廣場並隨即「劏售」，前者面積由28方呎起，兩項目已近售罄。

觀塘商廈炒高近兩成

受惠起動九龍東，觀塘商廈做價升幅令人咋舌，中原梁美玲話，皇廷廣場連錄數宗短炒獲利個案，其中中層有個單位以約953萬元「摸上摸」售，呎價8,739元，三個月樓價飆升近兩成。尖沙咀乙級商廈亦獲投資者追落後，美聯商業許少娟表示，喺山林道嘅高荔商業中心7樓A室，以近555萬元賣咗，呎價約7,310元，創咗物業嘅呎價新高。

另外，睇番土地註冊處資料，旺角上海街698號地下至5樓，錄臨時買賣登記2.26億元。上址係科達地產湯君明等賣出嚟，二○○七年以8,850萬元購入，未計仲有個地舖未賣，帳面已賺逾1.3億元。