牛熊對壘：國指走勢強吼20854

滬綜指上周五勁升超過4%，港股拉着衫尾，都錄得0.7%進帳，再創年內新高，收報22,605點，主板成交723億元。

唔少上市公司趁市旺狂抽水，但都震唔散個市，皆因熱錢源源不絕流入，部分缸邊友不禁問，這個資金市可以玩到幾時？筆者認為這次升市醞釀多時，目前多樣支持因素如經濟數據、資金流向，市場信心都齊備，是一個觸底大升浪，唔應該用短線心態去捕捉長線走向。

不過，港股由六月觸底回升以來，大幅跑贏A股，偷步炒就要付出代價，就是終有一日其升幅會跑輸番A股，若然A股今次發力後升勢持續，大家就要把資金比例多放在A股相關股份身上。勤力的輪場股友呢排幾乎都玩過吓A股ETF的窩輪，上周五3隻相關股份的窩輪成交合共12.98億元，佔整體窩輪成交24.4%。最受歡迎的華夏滬深三百（03188）窩輪，單隻成交達5.18億元，相信其中一個原因是其現價較基金資產淨值只有1.8%溢價，低過其他ETF。

小注怡情慎防牛皮市

指數飆高，淡友真係無啖好食，上周五再有19隻熊證被強制收回，其中11隻為恒指熊證，涉及1.6億份街貨，約314張對沖期指。上周五所見，有1,278萬元資金流出恒指輪證好倉，淡倉同日流入1,358萬元。上周恒指累升414點，周五美股跌35點，加上年尾，好友或會先行食胡鎖定利潤，一二年餘下兩周再爆升的機會未必好高，無論是睇好定睇淡，建議大家都唔好太大注，慎防進入牛皮市，不利衍生工具。

國指上周五升1.48%，報11,307點，走勢強過恒指，事關大部分的券商都出力唱好A股，帶動大市的都是國企中資股，相信情況將持續。若然本周初出現獲利盤，市況整固，股友可趁機撈底。中企高盛購（20854）明年五月三十日到期，行使價11,400點，實際槓桿8.8倍，引伸波幅25%。