樓市出更：投資雙雄睇樓市兩極

樓價高企，無契盤、凶宅一類平盤，差不多被搶購一空，市場筍盤所剩無幾，持有近20項物業嘅另類投資者伍冠流睇好樓市，佢相信半年後樓價會再上，手頭單位會繼續「收住租」先，部分租約到期單位就會加租一成；不過，另一投資者陳應佳就話，依家出手隨時「摸頂」，佢就絕對唔會入貨咁話。

鍾情無契盤、凶宅等另類物業嘅資深投資者伍冠流同劉Sir講，自從政府推出雙辣招，樓價持續高企不下，好少「筍盤執」，所以決定收住租先，依家手頭有約17至18個物業，當中住宅佔八至九成，除咗部分近年買入嘅單位回報率只約5厘，個別早年買入嘅就高逾10厘。

另類盤回報達10厘

佢早前將沙田第一城48座低層一個疑似凶宅，租畀3個內地大學生，月租約9,500元，較原來約6,000元增加近六成，回報率約10厘；明年一月底喺北角、沙田及屯門區，合共有約3個住宅單位租期屆滿，計劃全部加租一成，包括北角新都城大廈一個三房單位，由於有一個房間保留唔租，只係租到每月約7,500元，較市價低。

佢又話，上年用約莫136萬元買入嘅沙田廣林苑低層「無契盤」，由於租得無咁好，每月租金只係6,200元，回報率約5.5厘，所以九月份趁好價以約186萬元減持套現。不過，現階段唔會再沽貨，因為對後市睇好，認為呢幾個月積聚嘅購買力，會喺半年後逐步釋放，相信屆時樓價會再向上。

買樓綁三年成本高

同係「另類物業」資深投資者嘅陳應佳就話，依家物業價錢太貴，出手隨時「摸頂」，加上政府推出雙辣招，將住宅物業「綁死」三年，靈活性大降，加上轉售成本高，所以絕對唔會入貨咁話。

佢又話，依家手頭持有6至7個收租物業，主要集中屯門區，除咗新興工業大廈同埋恒威工業中心兩個工貿單位，另外4個都係住宅盤，包括兆禧苑、兆康苑等，現時每月平均租金約6,500元，回報率一律超過6厘。

對於市場上有部分投資者，趁樓價咁高而減貨止賺離場，佢就話，手頭嘅物業全部收緊租，有穩定嘅租金回報，而且大部分都係低價買入，「賣咗買唔番」，所以一動不如一靜，決定採取「唔買唔賣」策略。