股海實戰：濰柴動力突圍而上

上周A股絕地反擊，滬綜指兩千點失而復得，恒指亦再創五十二周新高，今年新股王人保（01339）集天時地利人和，掛牌首日收市價較招股價升近7%。不過，開始聽到股友話，嚟緊美國財政懸崖問題進展難測，加埋擔心愈近長假交投可能會轉靜，故若然本周恒指踢唔穿22,400至22,500點區域，會選擇沽貨鎖定利潤。

一如預期，上周五尾市指數基金掃高昆能（00135），股價曾高見16.96元，可惜阿莊喺17元排沽，結果當然係沽唔到，本周初都會睇位食胡。手持嘅東風（00489）再遇阻於12元，亦會睇位走一轉。至於波司登（03998），上周五以全日高位2.35元收市，本周企穩有望返家鄉，否則都係要睇位落車，擬換入上月廿三日見報推介嘅滬杭甬（00576）。

南車時代走勢對辦

上大人拋出「城鎮化」三個字，內房及水泥股即時成炒家樂園，上周本欄提及嘅南車時代（03898）走勢都幾對辦，上周五曾高見26.3元，收報25.6元。機械股亦係城鎮化概念股，見濰柴（02338）上周成功突破30元關，上周五高見33.5元，走勢比想像中強。

濰柴主要製銷動力總成（發動機、變速箱、車橋）、商用車及汽車零部件，今年首九個月純利同比下跌47%至24.08億元人仔，單計第三季度純利5.11億元人仔，同比跌52.62%，主要與行業不景氣有關，屬非戰之罪。反而，公司把握機會進行收購，有助鞏固龍頭地位。

隨着中央持續推進城鎮化及工業化，將長期支撐物流運輸車輛及工程類機械市場穩定發展，而踏入第四季，內地加快審批基建項目，以及天然氣發動機需求上升，相信都有助其業務觸底回穩。

目前市場預計，今年濰柴盈利將倒退兩至三成。其股價由今年首季38元水平反覆回落至七月份嘅17元水平，累跌五成，頗大程度反映業績倒退嘅預期。公司於十月下旬公布第三季度業績純利倒退，但其後股價仍力守喺26元水平，上周藉城填化概念突圍而上，50日線有勢抽穿250日線，短線回吐守穩29至30元區域，應該仲有得諗！