樓市出更：大道中賣衫搶貴舖租

香港一線街舖租金高，早前有報告話，中環核心地舖呎租近1,200元，係亞太區第二高，原因係唔少國際服裝品牌搶租，當中以皇后大道中近雪廠街同砵典乍街一段最受歡迎，六、七年前條街以金行同銀行為主，近年已畀連鎖服裝品牌取代。

有港島區代理同劉Sir講，依家皇后大道中近雪廠街同砵典乍街嘅一段，商戶數目40多間，賣嘅嘢明顯「歸邊」，超過一半係國際服裝品牌，另近半商戶係連鎖金行同埋珠寶店，同零星幾間老牌金飾錶行，新舊租戶交替下，呢段街呎租由約200元至近1,300元不等，平均約1,100元。

老牌金舖靠熟客捧場

面對承租能力「超強」嘅商戶湧入，中環核心零售區街舖租金大升，喺該段街道一間老牌珠寶店打工逾二十年嘅營業員話，「以前條街大部分舖頭賣金飾珠寶，可以起到協同效應，依家生意難做，生意主要係靠熟客」。

近年歐洲部分大型服裝品牌搶攻香港零售市場，但係銅鑼灣地舖盤又唔多，面積較細，大型服裝店唔係好夠用，唔少商戶就會進駐中環大型商場或區內周邊街舖。

上面講嘅皇后大道中近雪廠街與砵典乍街一段，歐、美等大型服裝品牌由四、五年前嘅只約6、7間，大增至目前超過20間，帶動新租金以倍增。據悉一間連鎖服裝品牌月前承租咗皇后大道中單號地下及樓上部分，月租約380萬元，呎租約200元，較前租客內地工藝品公司租金高約2.4倍。

ZARA預租 貴H&M逾倍

另外，70號嘅卡佛大廈地庫、地下、1至3樓共5層，獲歐洲服裝品牌ZARA以每月約1,100萬元預租，呎租約200元，較現有租客瑞典服裝品牌H & M租金亦高出約1.2倍。

經常到中環消費嘅Frankie就話，「近年喺中環係開多咗唔少世界頂尖品牌服裝店，一條褲都要成幾千元，不過，亦有唔少走中價路線嘅品牌進駐，所以一般香港人都仲消費得起。」