樓市出更：尖沙咀甲廈靜到「食蛋」

呢幾年九龍東寫字樓買賣熱爆，價量齊升，但傳統商業區尖沙咀就靜晒，睇番代理嘅資料，今年頭十一個月，尖沙咀其中6幢指標寫字樓買賣總成交70宗唔夠，同舊年同期比少約27%，期間南洋中心同力寶太陽廣場都罕有咁八個月「食蛋」。

政府起動九龍東，要將個區打造成第二個商業核心區，連鎖效應下，區內好多幢新起嘅甲級寫字樓都賣個滿堂紅，此起彼落，尖沙咀甲級寫字樓購買力就大減。綜合香港置業（工商舖）同市場資訊，今年一月到十一月，尖沙咀其中6幢指標寫字樓買賣成交僅共約69宗，相對舊年同期約94宗，足足少約25宗。

好時中心半年零成交

上述資料又話，今年力寶太陽廣場有八個月未有錄得買賣成交，頭十一個月只係有4宗買賣，同舊年同期比少咗14宗，按年減幅更達77%，至於期內買賣成交集中喺中低層。同區南洋中心亦唔好得幾多，同樣有八個月成交「食蛋」，到依家為止，只係錄到3宗買賣。至於好時中心亦有六個月未錄得買賣登記，到依家買賣成交只係有8宗；而永安廣場亦有七個月成交「食蛋」，今年暫時錄到10宗成交。

香港置業至尊商業助理營業董事曾旭暘話，尖沙咀甲級寫字樓，樓齡一般都有二十年，無論係大廈設計同用料，都好難同新建寫字樓比，資金東移觀塘及九龍灣已大勢所趨。

旺角商廈摸上摸貴24%

短炒買賣已蔓延至乙級商廈，美聯商業溫湘琪同劉Sir講，旺角太子商業大廈601至03室三個月內「摸上摸」走兩轉，最新成交價約1,550萬元，呎價約7,049元，樓價期間累升近24%，新買家係教育中心。另有代理報料，黃竹坑One Island South中層單位以約6,220萬元摸出，呎價約1.3萬元，創港島南區商廈呎價新高。

至於商舖方面，中原余錦良話，有個投資者伺機標售深水埗黃竹街9至13號地下C舖等樓面，同埋太子砵蘭街456號及界限街38A號地下等一批單位，市值共約1.9億元，截標日期係下月十六號。另外亦市傳尖沙咀彌敦道一個地庫以約6.6億元售出。

另一方面，有消息話，屯門栢麗廣場有一批共約300個車位，以綑綁式放售，意向價約1億元，折約每個車位33萬多元。