股海實戰：港交所水漲船高

恒指上月十連揚，之後只係回咗三個交易日又再重現升勢，尋日市況先跌後回升，高位見21,832點，收市報21,821點，升180點，成交增至586億元，雖然並未突破五十二周即市新高，卻已再創五十二周收市新高。顯見，雖然熱錢流入香港嘅規模仲未算好多，至今為止金管局先後八次入市，估計共涉約250億港元，但更重要嘅係，熱錢流入似乎已形成一個趨勢，這猶如向魚缸打了一口強心針，而從近期大市調整成交縮、反彈成交增，亦足見市底硬淨。

中資股升勢全面

尋日A股氣氛亦佳，主要係十月份製造業PMI重返盛衰分界線之上，且按月上升，顯示經濟逐步確立企穩回升嘅趨勢。同時，有指十月份內地一百城市住宅均價環比上升0.17%，乃連續五個月上升。難怪尋日中資股升勢頗為全面，水泥、航運、電訊設備、內房、內銀同內險股都有不俗表現。

阿莊組合所持有嘅國壽（02628），尋日上過23.55元，呢轉再上就睇五十二周高位24.7元；中傳動（00658）2.5元水平支持總算經得起考驗，尋日反彈上高位見2.76元，加上見到華能新能源（00958）、大唐新能源（01798）及金風科技（02208）都郁郁哋，就再坐一會。至於坐咗好幾個月嘅昆能（00135），尋日曾高見14.8元，但見到呢個星期沽空比率唔細，若然呢轉突破唔到15元，可考慮先行食胡。

講到熱錢流入，其實最直接受惠嘅應該係港交所（00388）。阿莊粗略估計，九月及十月份港股每日平均成交額均企穩喺520億元樓上，較八月份數字高出接近兩成，若然本月交投持續改善，末季經營數字值得期待，並有望成為刺激股價表現嘅催化劑。

今年第二、三季港交所股價成功考驗100元關承接，九月初以來反覆向上，上月已重上250日線，乃去年第三季以來首次。若然睇好熱錢流入掀魚缸新升浪，港交所可視為首選之列，季內股價有機會反覆向上挑戰首季高位148.9元，初步支持喺250日線121元。