樓市出更：華蘭中心嗌到萬六蚊呎

財爺暗示暫無計劃調控工商舖，唔少呢類物業嘅業主叫價即變進取，好似鰂魚涌工廈華蘭中心24樓頂層連天台嘅業主，將叫價加到約1.5億元，除比今年中開價嗌高六成，呎價逾1.6萬元，拍得住上環寫字樓信德中心東翼單位開價。

市場近排盛傳會出招打擊工商舖炒賣，不過，財爺只係話會繼續睇住事情發展，有需要先唔排除推出措施。此話一出，令業主信心大增。

尖沙咀鐵約盤叫1.28億

利嘉閣（工商舖）林淑怡同劉Sir講，華蘭中心24樓頂層單位，面積約9,183方呎，連面積約6,000方呎天台，今年中開價每方呎最少1萬元，已貴絕全港工廈，業主依家睇好後市，將叫價加到每方呎約1.63餘萬元，涉資約1.5億元。

利嘉閣邱兆康話，尖沙咀亞士厘道16號地下C舖，依家由便利店每月12萬元租緊，業主睇好鐵約盤大把人吼，叫價1.28億元。另一方面，有代理爆料，日前錄成交嘅同區百樂酒店商場部分，新買家擬拆售商舖，個別靚位獲出價近3.5億洽購。

其實，唔少企業早前已入市，據土地註冊處資料，恒生銀行（00011）或有關公司曾標售嘅九龍灣德福大廈8及9樓，上個月中錄臨時買賣登記，涉資2.22億元，買家係利奧紙品集團（香港）。

富豪車位一次買12個

政府多番出手，都放生車位，令到車位甚為吃香。美聯翁凱傑稱，有投資者喺新兩招推出後，覺得車位市場升值潛力高，即以約220萬元一口氣買入沙田富豪花園12個車位收租，每個約18.8萬至22萬元，以現時月租約1,000元計，料個別租金回報率可逾6厘，據聞個投資者仲有意再入貨。

金龍地產馮宇成稱，有外區投資者原本想買上水御皇庭兩房單位，但見新措施推出，即刻轉軚以55萬元買入同屋苑單號車位收租，售價再創新高。