Fundman睇市：化工股炒落後

上周五與本周二兩日，道指分別出現200點過外的跌幅，但港股均不為所動，尋日仲拗腰倒升，造出九日連升紀錄。技術上，港股從九月初低位19,076點，至今累積14.1%升幅，9日RSI去到85.4極超買水平，不過升市莫估頂，尤其愈近中央召開十八大會議，股市對具體推出振興經濟政策的預期升溫，熱錢湧入有滯後效應，股市音樂椅遊戲，保守估計至少玩到下月初至月中。

講番股事，近日推介幾隻落後股續有進帳，多得瑞銀報告品題，早兩日仲呆呆滯滯的奶粉股雅士利（01230）終於開車，十三球成交抽升6.5%報1.81元，創十五個月以來新高，只要成交持續配合，現價市盈率9.8倍，減淨現金後得5.9倍，仲係平到極，今浪見到2至2.1元目標機會十分大。

華南出口製造業有死貓彈迹象，心水的化工股份，亦開始見到炒落後情況。葉氏化工（00408）及東岳（00189）分別升4.7%及6.3%，連成交疏到極的理文化工（00746），都有3.7%進帳。本來理文在三股中最平，可惜介紹上市實在解決唔到貨疏問題，只怕炒完一浸，上車容易落車難，倒不如睇番有優良往績的葉氏。有一點值得留意，葉氏在九月底十月初跌浪中，成交不斷增加，看來有機構投資者按捺不住沽貨離場，5元樓下清倉後連抽兩日，看來新接貨者實力相當。

繼續垃圾崗之中尋寶，發盈警的國美（00493）股價不跌。公司預告截至九月底的第三季度，蝕1至2億元（人民幣．下同），令首三季累積虧損擴大到6至7億元，主要原因包括銷售收入下滑、人工及租金費用上升、電子商務持續虧損。不過，假如逐季計，第三季流血較第二季的5.68億元少。

國美價殘短炒無妨

國美是今年三月開始實行一系列整頓計劃，包括關掉效益差的分店，縮減店舖面積及人手，由於重組成本在過去兩季盈虧中陸續反映，第四季真正輕身上路，加上同期有黃金周、聖誕等銷費旺季，看來國美第四季業績有頗大可能性轉虧為盈。

估計今年國美同店銷售，最終會見到17至20%的倒退，顯然明年更衰的機會唔大。以市帳率計，國美目前僅得0.7倍，遠低過○九年谷底的1.7倍。當然，今日國美受着網上商貿公司的價格挑戰，不能同日而語，但純粹貪平短炒幾日應該無妨，尤其昨日壞消息下跌唔落，如果能回到六、七月的1至1.2元，短期回報經已唔錯。