股海實戰：二三線地產股玩尋寶

港股九連升兼創五十二周高，真係威水！熱錢掃入本地地產股，長實（00001）、恒地（00012）和信置（00083）股價均創出五十二周高，呢次四叔真係冇老點！國企股方面，一線股抖緊氣，反觀幾隻被放喺「冰櫃」多年嘅二、三線國企股突然跑出，東北電氣（00042）、昆明機床（00300）、成都普天電纜（01202）升幅介乎16至43%，就連一批過氣中資細價股亦開始翻炒，航天控股（00031）、航天萬源（01185）、深圳科技（00106）、中信21世紀（00241）升幅介乎8至25%。

炒家睇準樓價難跌，幾隻龍頭地產股已起動，二、三線地產股亦陸續起步。呢兩個月金朝陽（00878）、大昌（00088）、合和（00054）、永安（00289）、香港興業（00480）都唔聲唔聲上咗嚟。要發掘落後股，遠東發展（00035）可望多兩眼。

遠東發展值得留意

今年四月，遠展喺場外向對沖基金Penta回購2.3億股，每股作價1.23元，基金減持因素得以淡化。再睇基本因素，現價市帳率才0.4倍，今年八月底紅磡住宅項目已售出八成單位，今年底擬推西洋菜街住宅項目，明年下半年推薄扶林道住宅項目及元朗住宅項目，收成可期，股價冇理由睇得太淡。博市帳率去番0.5至0.6倍，目標區域見1.9至2.2元水平，不跌穿1.45元可續持有。

若然想搵再冷門啲嘅，可以望吓隻有利（00406），呢隻股本身做建築業務，十一年前買入銅鑼灣一地盤，金融海嘯前成功出售獲利逾10億元，令人刮目相看。嚟緊政府加快興建公營房屋，建築業務唔使愁。但呢隻股嘅寶藏，係當年運用出售發展物業套現所得，買咗觀塘、上環同土瓜灣項目，其中上環酒店項目預計年底前開業、觀塘工廈項目受惠政府發展東九龍商業區，而土瓜灣嘅工廈將發展成商住項目，預計一四年年底竣工，相信現時齋計地皮都經已升值逾倍，未來兩年公司資產價值將逐步釋放，現價市帳率只得0.4倍，自問有實力又有耐性，呢啲滄海遺珠唔好走寶！

順帶一提，阿莊持有嘅華能（00902）季績果然有交代，股價衝穿6元關，曾高見6.13元，以平均價6.09元沽出食胡。