樓市出更：10億貨放盤趁高慶

大量熱錢湧港，勢再推動資產價格上升，唔少手持商廈、街舖、甚至全幢物業嘅投資者都趁機放貨，包括意向價約4.5億元嘅中環威靈頓街雙號全幢等多項物業，紛趁機放售，涉資共逾10億元。

第一太平戴維斯溫武忠同劉Sir講，由本地朱姓投資者持有嘅威靈頓街60號威安商業大廈，近期獲唔少有興趣買家主動洽購，除咗本地廠家，仲有估計係內地資金背景嘅投資者，雙雙出價都近4億元，吸引業主全幢放賣，意向價約4.5億元。

上址係一幢14層高商用大廈，係區內暫唯一放售嘅全幢物業，樓面約8,290方呎， 地舖至4樓租咗畀時裝品牌；樓上則係寫字樓同銀座式店舖，呎租30至40元，出租率80%。

葵涌KCC全層涉1.85億

另外，高緯環球朱寶珊Maggie亦話，市場氣氛甚好，北角英皇道東寶大廈一籃子共5個地舖亦連約放售，該批舖位面積共約5,400方呎，意向價約2.4億元，呎價約4.4萬元，現時租客包括經營美容同埋餐廳，每月租金共25萬元，據講業主涉及內地資金背景。

Maggie仲話，葵涌九龍貿易中心KCC，亦有投資者將B座13樓全層放摸或者拆售，面積由938方呎起，而全層面積約2.5萬方呎，呎價7,100元起，估計全層賣出平均呎價達約7,400元，涉額料約1.85億元。

美聯蕭惠碧亦話，中環中保集團大廈全層連約標售，面積約14,505方呎，意向價約1.8億元，呎價約1.24萬元，現時每月租金收入超過32萬元，下月二十七日截標。

北角一籃子獲30億洽

投資者近排睇好市區乙級商廈，其中投資者黎汝遠喺本月初以452萬元接摸貨買入灣仔金威商業大廈中層單位，呎價約7,834元，有代理報料，話佢已隨即叫高15%價放售。

另啱啱有消息話，基金等持有嘅北角電氣道169號宏利保險中心全幢，連同毗鄰上址一籃子車位，被另一基金出價逾30億元洽購，呎價約7,500元，較一○年中購入價高出超過40%。