股海實戰：上實向30元推進

承接隔晚美股升勢，港股昨日終於打破悶局，恒指收報21,416點，升209點，成交576億元，又再有31隻熊仔遭打靶。滙控（00005）成升市領頭羊，股價創去年八月初以來即市高位，若然呢轉大笨象要試圖跨越80元大關，恒指有機會挑戰今年高位21,760點。

呢期大行報告恢復「神力」，命中率回升。好似近日高盛唱好大笨象，大笨象即起舞；瑞信唱好內銀，全體內銀果然交足功課；獲高盛唱好嘅中國無線（02369），股價即飆17%，而獲德銀唱好嘅德永佳（00321）股價亦升近一成。

紅籌股表現唔輸蝕

呢期國指大翻身，紅籌股亦唔輸蝕。除咗尋日提及嘅越秀地產（00123）可留意外，上海實業（00363）上周五亦開始踩油向上，尋日高收報25.2元，成交增至425萬股，乃七月中旬以來最大單日成交股數。過去一年，其股價多次回落至20元水平便止跌回穩，已成功構建一個平台支持，現水平追入，風險有數得計。

仲記得今年八月底，上實管理層話會着手整合水務業務資產，並維持今年底將分拆喺新加坡上市嘅亞洲水務來港作第二上市嘅計劃。若計劃冇變，相信好快有眉目，可成為股價嘅催化劑。

上實另外兩項主要業務，乃收費公路及房地產業務，早前內部研究顯示，節日假期公路免費政策對整體收入影響有限，至於房地產業務，背靠上海市政府嘅上實財政實力毋庸置疑，而旗下嘅房地產業務旗艦上實城開（00563），下半年業績可望改善，管理層有信心實現全年銷售目標。換言之，上半年圍繞房地產業務嘅利淡因素已消除，嚟緊相關業務價值可逐步浮現，並成為支持股價重拾升軌道嘅重要因素之一。此外，較早前系內公司高層出現人士變動及負面消息均已作消化。

入市策略方面，短線整固喺24至25元邊可留意收集機會，目標反覆向28至30元阻力區推進，250日線23.1元未宜有失。