樓市出更：遠期樓花舖嗌現貨價

銅鑼灣一線地舖做價及租金同樣驚人，連帶樓上舖都非常搶手，喺銅鑼灣擁有多項發展物業嘅金朝陽（00878），將旗下霎東街11至13號「THE SHARP」打造成銀座式商舖，趁勢响今年底前以市場罕見長達三年嘅遠期樓花盤形式預售，意向呎價睇3萬元，入場費4,800萬元，都幾進取。

金朝陽執行董事陳慧苓（Vivian）同劉Sir講，雖然近排內地豪客嚟香港使錢無以前咁豪爽，但相信只係增幅少咗，唔係出現跌幅，本港高價消費前景依然向好。

銅鑼灣「THE SHARP」快推

佢話，上述霎東街重建項目「THE SHARP」，原先舊樓喺好多年前已經低調進行收購，幾年前開始加快步伐，由於區內一線地舖盤源少租金高，唔少投資者都積極搵盤，故決定將項目打造成一幢罕有二十四小時垂直發展嘅商舖，樓上29層下個月就進行軟銷工作，最快今年底前預售。

Vivian話，由於區內缺盤，雖然上址响二○一五年第三季先至入伙，不過，依家佢哋已經收到百幾個查詢，由於反應理想，意向呎價睇3萬元，以每層1,600方呎計，入場費大約4,800萬元。至於地舖、1及2樓個靚巨舖，公司依家諗住長揸收租，租金未定。據悉，今年同區多幢商用物業易手，如登龍街2號大利行，成交呎價約1.4萬元。

至於金朝陽同系嘅登龍街大型綜合商業項目，Vivian透露下個星期會有好消息；不過，有代理同劉Sir爆料，有餐飲集團睇中上址樓上幾層，已經傾到尾聲。Vivian仲話，金朝陽中心地下D舖水晶品店租用地舖，出年二月租約到期，有代理話，上址依家市值月租大約80萬元，估計新月租要240萬元，比依家高兩倍。

利嘉閣邱兆康又話，同區景隆街30至34號地下7號舖依家叫價1億元，呎價大約10萬元，叫價較兩年前高出1倍。

基金售創紀 呎價9300

九龍東商廈繼續爆升，由基金持有嘅觀塘創紀之城3期23樓，據土地註冊處資料，該層單位以7,570萬元賣咗，個單位呎價去到9,300元，創該廈呎價新高。

近排唔少非牟利團體都買商廈，沙田都會廣場18同19樓連一批車位合共以1.08億元售出，呎價大約4,000元，買家係沙田浸信會。