魚缸Blogger：信義最壞時刻已過
今日輪到日本央行公布議息結果，坊間好多聲音話最近加碼放水10萬億yen未夠喉，今日好可能再有動作，但參考上一次經驗，魚缸得早市受刺激升一升，所以都係唔好有咁大期望。
領航板塊升完之後，尋日就輪到三、四線發力，當中不妨留意久違嘅信義玻璃（00868）。受上半年純利急跌影響，信義玻璃今年股價大部分時間都處於一浪低過一浪嘅狀態，之不過隨住浮法玻璃價格回升，最近阿爺又接連公布多個基建投資項目，似乎集團嘅最壞時刻經已過去。
睇番股價，尋日一支大陽燭成功抽穿50日線阻力，係近四個月來第一次，加上不對稱雙底頸線3.79元又收復埋，量度升幅應可見4.2元。
信義玻璃（00868）
阻力位：4.2元
支持位：3.7元