Fundman睇市：渣打有得諗

如果尋日死守魚缸，下午勢必被幾十點的指數波幅，搞到飯氣攻心搵周公去。恒指收市升19點，報20,907點，即月期指由近日炒開高水，漸漸變低水收，報20,871點，似乎對下星期一A股復市，並非太好兆頭，事實若非多得滙控（00005）股價尋日創十四個月新高，一隻股票為恒指貢獻56點撐住，實質恒指經已見紅，加埋沽空佔比跌至8.44%的六個交易日最低水平，好友想挾上去突破21,000點，難度大增也。

在低息加埋磚頭通脹夾擊下，領匯（00823）尋日收37.2元，創上市新高，唯獨注入廣州IFC後，上星期以每股3.3元批股的越秀房託（00405）插低5%，收報3.59元。早前已提過，批股以T+5形式結算，理論接貨者下周一先收到貨，看來部分尋日已經率先偷步食胡，以批股價同尋日收市價比較，仲有8.7%利潤，接貨者今次都算肥仔。

近期另一個最受私人銀行客仔歡迎的，非要數銀行所發的永續債券（Perpetual bond）莫屬。簿仔零息，搵5至7厘回報頂住一吓通脹，確係無可厚非，不過近期債價都升得有啲誇張，就好似近期先被美國紐約州調查，再傳被淡馬錫試盤減持，總之是非纏身的渣打（02888），現時股價比八月初出事時仍低4.4%，反而渣打發的Perpetual，老早升穿兩件事發生前的高位。

唔單止股弱債強，渣打今年升得4.6%，比滙控同期的25.2%升幅落後幾條街，以一三年3.9厘回報，9.7倍PE，如果有揸滙控，不妨諗諗換貨買些少渣打。若然怕淡馬錫真係沽貨的話，可以考慮分兩注入市，現水平先買一半，假如真係折讓減持，攞到就攞，攞唔到响街掃。

維達有條件見12元

市況雖靜，部分二三線股卻各自各精彩，尋日輪到紙品股發威。簡言之，高財務槓桿、受惠於人行未來半年的一至兩次減息、加埋原材料木漿價格下降，已經夠晒理由炒佢，奇怪是基本條件接近的廁紙股卻相形見絀，維達（03331）上星期股價隊穿10元，近兩日走勢先好番些少。

瑞信尋日出報告畀維達跑贏大市評級，睇13.5元，認為其一二至一五年銷售及盈利複合年增長可達26.5%及30%，理由是市佔率上升、產品組合改善及毛利見底等因素。

昨日維達收報10.82元，剛好升至10日線水平，如果突破，短期有條件升上12元樓上，鍾意跑短的不妨留意。