樓市出更：工轉商補價爆上

九龍東寫字樓做價已破1萬元一呎，區內嘅工廈轉商廈用途補地價亦水漲船高。劉Sir收到風，觀塘成業街10號全幢工廈啱啱同政府達成約7.3億元嘅工轉商補地價協議，計番呎價要約莫2,900元，相信係全港歷來工轉商每方呎補地價新高。

億京發展黎裕宗同劉Sir講，旗下嘅成業街10號舊年年初工轉商補地價，政府回覆呎價要3,400幾元，公司經過多番上訴後，終於與地政總署達成補地價協議，涉資約7.3億元。

建逾30層 明年賣樓花

以上址總樓面約25萬多方呎計，呎價都要約2,900元。預計上址會起大約30幾層，樓下有兩層零售，相信最快出年下半年才以樓花形式出售。據悉，億京二○○九年以約3.4億元購入上址，每方呎樓面地價約1,600元。

近年億京喺觀塘買咗好多幢工廈，近排都陸續拍板補地價轉做商廈，兩個月前就斥約10億元為觀塘駿業街52至56號商廈重建項目補地價，涉資係○七年以來最大單宗同類補地價個案，呎價約2,700元。

皇廷持貨年幾賺39%

本周觀塘最少錄得3宗寫字樓全層買賣，中原徐志聰話，皇廷廣場高層全層以約1.08億元賣出，原業主一年多帳面賺約3,003萬元，賺幅約39%。

據悉，金鐘海富中心1座高層以約9,386萬元沽出，呎價1.9萬元，係該廈呎價歷來新高，原業主十四年帳面賺6,236萬元。據土地註冊處資料，曾錄終止買賣登記嘅上環信德中心東翼33樓16、18、26及28室，以2.1億元轉手，買家係紀惠集團廖湯慧靄等。

美聯商業蕭惠碧話，柴灣東貿廣場35及36樓頂層複式寫字樓單位連6個車位以確認人形式放售，單位意向價1.2億元。祥益地產袁思賢指，屯門中央廣場中層全層連約以4,950萬元「摸出」，單位一個月升值逾146萬。

資深投資者黎汝遠話尋日買入觀塘馬蹄徑3號地下A舖，涉資約2,000萬元，呎價約3萬元。另土地註冊處資料顯示，西環新海旁街23號地舖等樓面逾1.08億元成交。