股海實戰:安踏強勢可延續

眨吓眼又踏入第四季。今年以來恒指大致處於三千點嘅波幅區,目前正處接近波幅區頂部。A股本周休市,暫時少咗滬綜指再試兩千點嘅憂慮,中資板塊有望承接上周回穩之勢。事實上,為確保十八大順利召開,維穩力量會繼續發揮正面作用,唔排除本月指數仍未有大方向,等下月中美政局明朗化,好淡始可分出勝負。

備受存貨高企及銷售增長放緩困擾嘅體育用品股,近期有轉勢迹象,龍頭股李寧(02331)及安踏(02020)、二線股特步(01368)、匹克(01968)及中國動向(03818),股價都見咗短期底部。由於呢個板塊早喺○九年見頂後便進入大跌浪,算係最早進行大調整嘅中字股,喺市場流動性改善,利好經濟復甦嘅前提下,板塊氣氛開始回暖,中短期可重新關注相關股份表現。

去年度安踏嘅經營現金流入為17億元(人仔.下同),年終手頭現金及等值約30億元;而李寧嘅經營現金流入僅4.27億元,年終手頭現金及等值僅11.96億元;再睇安踏現價往績息率達8.2厘,李寧僅3厘,難免給比下去。是故安踏可享較高估值,現價市帳率仍有1.8倍,李寧僅1倍。

再睇埋今年上半年,安踏營業額同比跌11%至39.34億元,純利跌17%至7.69億元,派中期息每股23港仙;至於李寧同期收入同比減9.5%至38.8億元,純利大跌84.9%至4,400萬元,不派中期息,並預計全年可能錄得虧損。就咁睇牌面,安踏仍繼續保持優勢。

現雙牛利好訊號

上周安踏股價由全日低位5.4元抽高至5.96元(港元.下同)收市,單日升幅9.5%,成交1.38億元,全日平均成交價為5.93元,顯見唔少係喺高位追入。技術上,剛以大成交抽穿10日線,14日RSI約68,MACD初現雙牛利好訊號,短線可保強勢,下一個較大嘅阻力位喺250日線6.96元,留意喺5.7至5.8元嘅上車機會,不跌穿5.45元可繼續持有。

阿莊

體育用品股近期轉勢,李寧、安踏股價均先後見了短期底部。(資料圖片)