樓市出更：藥房攻入弼街向北望

旺角弼街近港鐵站一段向來係地道小食同舊式茶餐廳嘅集中地，不過，近年有主攻內地旅客嘅連鎖藥房「攻入」，代理話，該段街道大約有50間舖，早幾年平均呎租都係維持約250蚊左右，依家升到300幾蚊，代理估計，一、兩年之後，條街勢必愈來愈多為內地客而開嘅舖頭。

旺角弼街開始轉型。有代理話，近住旺角東站一段嘅弼街舖頭，一向都係賣民生廉價貨品同地道小食為主，顧客十居其九都係本地港人。

老牌餐室好彩早續約

不過，近年西洋南街地舖租金貴，附近嘅通菜街及廣華街舖位租盤又唔多，而弼街正正喺旺角新世紀廣場扶手電梯出口，係唔少內地旅客坐車嚟香港到旺角必經嘅地方之一，所以唔少商戶都睇好呢個地段，開始轉租弼街舖位。

弼街有幾間新藥房，門口擺晒好多箱內地客來港必掃嘅物品，如奶粉同尿片等，聽講有間連鎖藥房早前租咗弼街一個單號地舖，月租約18萬元，呎租約300元。該類連鎖店唔算多，但已扯高條街平均呎租去至300幾元，比起西洋菜南街呎租動輒600至700元低一大截，但按年升幅都有兩成。

喺弼街開舖四十年嘅金華冰廳，老闆娘陳太同劉sir講，「好彩佢哋趁租用嘅餐廳現址月前易手前，簽咗新約續租，每月租金加到去26萬元，而舖頭員工有30幾人，加埋原材料來貨貴咗，新租金已經係可接受嘅頂點，如果下個約大幅加租，經營就相當困難啦。」

喺弼街開舖賣玩具十幾年嘅廖先生話，「舖頭一向都係做街坊生意，賺錢唔多，幸好業主多年來以「友情價」租畀佢，都仲可以有少少錢賺。」