股海實戰：聯想候調整再考慮

臨近季結同長假前，A股突然發力大派紅包，對此市場傳聞甚多，其一為中證監將發布關於新股暫停上市安排，惟A股收市前官方經已作出否認。阿莊估計，大戶發放流料營造利好氣氛，既為季結交數，亦是為了乘機加開十月淡倉。以港股為例，現時十月國期及恒指未平倉合約分別達到11.4萬張及10.2萬張，賭桌注碼愈疊愈高，年底前好淡雙方料可分勝負！

十八大將會喺十月中旬召開，政府領導順利換屆，本應可為中國市場去除一項重大不明朗因素，但魚缸會否有起色，仲要睇海內外形勢，如過去兩季所作出嘅維穩措施效益如何、美國大選結果、歐債危機進展、QE3下嘅商品市場表現等等。考慮到外在變數太多，呢一刻對十八大前後嘅魚缸行情不宜作過分憧憬。

比亞迪成大鱷戰場

里昂話比亞迪（01211）僅值0.41元嘅言論成為魚缸熱門話題，近日聽聞有投行開比亞迪ELN，三個月利息達六十厘，行使價十二個幾。經驗相告，出現呢啲古靈精怪嘅現象，多半顯示隻股往後數月股價表現唔樂觀，為免成大鱷對賭下嘅「美點」，散戶最好行埋一邊，咪多手亂博反彈！

自歐債危機爆發後，聯想（00992）意識到海外市場不景氣，故將焦點轉移至內銷市場，結果只係○九年度業績曾見紅，之後三個財年盈利穩步增長，一二年度盈利基本上已重返○八年度嘅水平，相比起過去五年環球經濟情況，呢家中資企業應付危機嘅能力可予高度評價。

科技市場日新月異，近年桌上電腦市場正面對智能手機及平板電腦興起嘅挑戰。最近行業權威研究公司IDC便預計，喺一二至一六年，平板電腦佔智能聯網設備嘅份額將由10%上升至13%，智能手機則會由59%增至63%，而桌上電腦嘅份額則會由31%降至24%。從呢個角度睇，未來五年聯想能否保持喺全球市場嘅領先地位，便取決於能否順應潮流，加快推動智能手機同平板電腦業務發展，強化整個智能聯網設備組合。

最近內地對節能桌上電腦提供補貼，作為行業龍頭嘅聯想當然有利，但這短期利好因素，充其量只有助平衡經濟增長放緩對銷售表現所構成嘅風險，不宜過分誇大。未來公司要更上一層樓，最終都係要視乎全球市場及產品組合策略。近年聯想先後收購NEC、Medion，以至最近收購巴西CCE及Stoneware，可謂朝正確方向出發。

至於股價，現價預測市盈率不到14倍，但考慮到第三季全球市場情況，而年底前推出新產品嘅銷情尚待觀察，建議待現價出現約一成嘅調整，始作中線部署。