樓市出更：工廈無契盤爭崩頭

唔少住宅投資者都轉掃唔使畀額外印花稅（SSD）、兼且低水嘅工廈單位；買開「另類盤」嘅陳應佳（佳叔），以113萬元買入屯門新興工業大廈無契單位收租，喺一個月內兩度入市同區同類無契盤，涉資共220萬元。

上述新興工業大廈中層13室無契盤，尋日承押記人命喺拍賣場推出，開價只係90萬，吸引佳叔等投資者積極競投，經過14口競價，終由佳叔以113萬元投得，較開價搶高達25.6%，呎價約1,471元。

屯門恒威回報達6厘

佳叔同劉Sir講，覺得呢口價好貴，銀行估價約110萬元，自己心目中100萬元，不過股票唔識玩，銀紙又係咁貶值，買磚頭收租有保證喎，但住宅要畀SSD，所以轉玩工廈同舖位。

佢話呢個單位打算以每月5,000元租出，計番回報有成5.3厘，唔怪得佢話貴都照買啦！至於佢之前喺拍賣場以107萬元買入同區恒威工業中心一個「無契盤」，已經以5,500元租出，回報率高達6.2厘。

美聯工商彭潔儀話，投資者李冠亮亦摸出荃灣海盛路3號17樓C5室工廈樓花，套現712萬元，約一年多帳面賺近140萬元，賺幅近25%。

優質工廈及商舖有價有市，中原蔡鳴楚表示，觀塘天星中心31及32樓工貿複式樓花單位連兩車位，近排兩度調升開價放摸，依家每方呎加至約8,300元，涉資近8,000萬元，較業主上月初購入價累加逾6%。會德豐地產報喜，荃灣ONE MIDTOWN工貿項目悉數售罄，套現逾25億元。

葵涌維京半月炒高11%

另有代理向劉Sir爆料，有住宅客亦啱啱以179萬元「摸出」葵涌維京科技中心中層工商單位，僅十幾日帳面速袋19萬元。單位係中層戶，面積約550方呎，炒家睇中以179萬元接摸貨，樓價升逾11%。

另外，張姓投資者亦斥1億元購入新界屯門井財街15號地下連1樓酒家現用舖位，依家開價1.6億元放摸。

同時佢亦以1,930萬元摸出大角咀埃華街88至102號地舖，帳面速袋380萬元。