Fundman睇市：憧憬中央出手救市 A股快見底

昨日A股二千點鋼鐵底，被要錢唔要貨的內地股民一腳踩穿，收市指數死貓彈，返到2,004點，跌25點收市，創下四十四個月新低。

客觀而論，A股估值較過去十年兩次熊市低，刻下可能離低位不遠，尤其貨幣政策有充裕的放寬空間。而十八大盛傳下月中展開，憧憬中央有提振經濟措施公布，A股低位較大機會在月中前後出現。

前日人行出動史上最大規模的2,900億人仔逆回購，可惜人民幣拆息依然不為所動，在七個月高位徘徊。有芬佬話，即使人行逆回購不絕，但過去兩星期內地水緊情況卻是變本加厲，主要是粉飾季結，銀行資金供應變得緊張，不過過埋呢兩日應該有改善。按此推斷，最壞打算每日插1至2%，滬綜指都未必輕易到達淡友大摩的目標1,850點，但試穿2,000點，或者掂一掂1,900點的機會卻是存在。

曾經將比亞迪（01211）捧到天咁高的里昂分析員Scott Laprise，因為電動車神話不再，出報告畀比亞迪四毫一子目標價，僅及報告面世時14.7元股價的3%，唔少人紛紛打探點解呢位星級分析員咁做。

投資銀行研究部本身無賺錢能力，請大班高薪賓架番嚟長期報喜不報憂，講穿了都係希望刺激芬佬入市意欲，等公司sales team做多啲生意外，另一個不成文約定，是分析員與上市公司建立互信兼友好的關係，為未來融資或者購併生意鋪路。

隨着股市成交愈玩愈縮，傳統互惠基金生意有限，做長短倉（long & short）的對沖基金及高頻交易，漸漸變成投行爭奪佣金的新興戰線之一。而討好做淡的芬佬，就因而成為分析員的新任務，佢哋漸漸唔怕得罪公司，有些甚至咬住唔放，人人睇十蚊，佢唱五蚊，總之走到最前，分析員及其報告吸引更多眼球，也乘機幫公司做多單沽空生意。

比亞迪向10元進發

比亞迪會唔會見0.41元？主觀睇機會唔大，始終股神巴菲特的金漆招牌，點都值7至8元，可是從基本因素，筆者認為比亞迪仲係太貴。電動車距離普及，看來十畫至多得兩撇，以一間幾百億市值的公司，上半年賺得1,626萬人民幣，實在太難睇。即使街外預期下半年谷底反彈，全年賺6至7億人民幣，同單位數PE嘅汽車股仲係無得比。里昂報告出街後，比亞迪沽空股數由周一34.5萬股，倍增至過去兩日分別189及418萬股，淡友在13.5至15元依然願意屯駐重兵，只怕明年三月業績前，向10元樓下進發，可能性遠大於重返早前16至17元高位。