股海實戰：新能源股前路難行

歐債危機風雲再起，執筆時西班牙十年國債孳息率回升，德國股市受壓。再睇內地，滬綜指尋日一度低見1,999點，雖然其後重上2,004點收市，但似乎兩千點心理關口都係凶多吉少。外圍氣氛咁差，港股想飛都難，恒指一度跌穿20,500點，主要靠本地地產股撐場，中資股乏善足陳。總而言之，呢兩日最好都係隔岸觀火，少做少錯。

話中資板塊乏善足陳，並非信口開河。睇番A股，工農中建交五大內銀A股股價相繼創近四年新低，其中農行及中行A股更創歷史新低。顯然，即使中央匯金實現舊年十月嘅承諾，入市增持四大行股份，但仍無能力挽狂瀾於既倒。官方傳媒發專文叫股民打醒精神應對兩千點保衞戰，因為「當下的A股市場需要謹慎，但不值得絕望」云云，並詳列多項維穩措施。睇完長篇大論，阿莊嘅理解係，官方要做嘅經已做咗，但對幫助魚缸抗跌仍沒有十足把握，各位要自求多福！

屢創新低股民閉翳

口淡淡，唔爭在睇埋一個「悲情板塊」，就係新能源股。季內大唐新能源（01798）、中傳動（00658）、金風（02208）、華能新能源（00958）、中國風電（00182）、華電福新能源（00816）及中電新能源（00735），股價先後創出五十二周新低，而早喺五月份見五十二周新低嘅龍源（00916），股價雖然回穩，但仍走不出低位窄幅上落嘅局面，揸住呢啲股份嘅股民，都咪話唔閉翳！

成日話「十二五」中央如何力挺新能源產業發展，偏偏相關股份股價不斷走低，如同墮入無底深淵，主要係○八年金融危機後，新能源一波炒作熱浪，早已透支咗對行業嘅憧憬。遇上近年中國經濟增長明顯減速，對傳統能源嘅需求亦有所減少，新能源項目投資熱情不再，加上當中不少行業方向有誤，喺缺乏自主技術、高成本嘅問題下，造成產能過剩，無利可圖嘅局面，惡性競爭下企業投資回報期被迫不斷延後，國策光環褪色，相關股份價格一浪低於一浪，直頭係傷透股民心！

阿莊唔敢質疑中央推動節能環保嘅決心，但眼前新能源板塊嘅投資氣氛跌至低谷卻是不爭事實，相信企業盈利低企會喺明年上半年持續。除咗風電，其他光伏、新能源汽車等行業，亦唔見得好得去邊，總之圍繞「新能源」呢三個字真係路難行。如今有盈利基礎嘅傳統產業估值都咁平，尚處水深火熱嘅新能源板塊容易被比下去，值唔值得花心機繼續等待，就留待各位自行判斷！