樓市出更：560億大刁專擸舖

息口低企下，大孖沙都買磚頭保值，睇番代理數據，截至呢個星期初，今年頭三季過億元工商舖物業大刁差唔多有170宗，同舊年同期比多咗超過30%；總值就約560億元，按年升約12%。

唔少投資者都話美國再「印銀紙」刺激經濟有利本港樓市，舖壇投資者黃海明稱，今年底前再斥6至7億元掃貨。

劉Sir收到韋堅信測量師行同其他代理行啲資訊，原來截至本周初，第三季過億元工商舖大額成交近50宗，期內總值約160億元。若綜合今年頭三季嘅數字，成交量更高達170宗，總值約560億元，當中商舖物業成交最多，佔約69宗。

QE3有排玩 老手換靚貨

其中，恒隆地產（00101）或有關公司今年已先後售出4項商用物業，套現約30億元，如今年八月賣出嘅藍田麗港城商場同約150個車位，涉資約15億元。

美國推出第三輪量化寬鬆（QE3）只係兩個星期，熱錢已搶住買靚貨。韋堅信測量師行物業發展及投資董事許偉國稱，由於低息環境會維持一段長時間，業主普遍唔憂賣，估計下季大手成交量可能慢番啲。黃海明都話，除咗再加大金額買舖外，依家放售嘅灣仔金威商業大廈全幢原本開價約1.85億元，依家調高叫價5%。

投資者玩具城鄭躬洪指出，QE3對本港整體樓市有正面作用，最佳保值方法莫過於買物業。大鴻輝興業梁紹鴻表示，由於仍然有額外印花稅，料更多資金會流入工商舖。紀惠集團湯文亮就話，低息將持續一段長時間，可減輕供樓人士嘅負擔。

近排寫字樓租售成交多番，香港置業至尊商業董事翁鴻祥話佢計過數，全港依家有10幢優質寫字樓極之低水，好抵買，其中北角港運大廈今年平均呎價8,500元唔夠，估計下年度仲升多25%。

另有間在港上市內地體育用品公司轉租為買，以近5,400萬元購入灣仔會展廣場辦公大樓中層單位，呎價約2.2萬多元。另中原（工商舖）亦因QE3，將全年佣金收入調高20%至7.2億元。