股海實戰：華晨食胡最實際

港股繼續悶局，尋日恒指高低波幅僅110點，窄成咁，惟有炒股唔炒市。又有兩隻股票股價單日曾升過一倍，分別係豐臨（01152）同中盈（00766），但收市升幅分別回順至83%及34%。呢期股仔輪流靜極思動，但有幾多日貨仔就要睇炒家運氣！

呢頭美國才公布推出QE3，嗰頭就有投行估美國或會推QE4。事緣大摩嘅研究報告話，若然經濟繼續惡化，美國聯儲局或會喺年底推出QE4，並指出資產購買行動對股市嘅提振作用正在減弱，而QE通常會對增長類股票及垃圾股較有利，對醫療及電訊股嘅效益則不大。

長假前宜多持現金

回說組合持股，手持嘅數碼通（00315）似乎都係唔多升得起，考慮到長假前宜多持現金，尋日遂以15.5元沽出，至於尚持有嘅兩隻燃氣股昆能（00135）及中燃（00384），短期會密切留意走向，唔排除會悉數沽出。

近期中日關係緊張，做中日合營嘅車股成沽售對象，如東風（00489）及廣汽（02238），反觀做貴價歐洲車合營嘅華晨（01114）就被視為受益者，股價反覆向上，尋日升5%，收報8.37元，股價較七月及八月份低位分別升咗33%及22%。不過，論基本因素，阿莊對華晨未感放心，事緣公司旗下寶馬合營生產嘅車款屬中高檔產品，喺內地經濟增長持續放緩之下，高端消費市場銷情難免受到影響。

此外，某城中著名基金一直係華晨嘅捧場客，但今年以來不斷減持華晨，上月底持股量更降至低於5%。本月初，華晨控股股東曾配售舊股，翻查資料，上一次控股股東減持係喺○九年十二月上旬，該次配股前兩個月其股價炒高逾倍，但配股後四個月股價就好似被點穴。雖然歷史不一定重演，但末季汽車行業銷售表現並不明朗，華晨現價值博率亦只係一般，持貨有利潤可考慮逢高沽貨食胡；冇貨喺手，都係做旁觀者最自保！