樓市出更：漢口道筍舖1.45億售

鑑於尖沙咀廣東道等一線地舖放盤唔多，英皇國際（00163）亦睇好區內零售後市，一個月唔夠再下一城，剛以約1.45億元連約買咗漢口道25至29號地下B舖，呎價僅18萬多元，屬筍價，租金回報率約1.5厘，但當租約明年到期，新租金料可比依家高超過九成，租金回報料近3厘。

英皇國際執行董事張炳強（Donald）同劉Sir講，呢幾年尖沙咀好多新建銀座式商廈開業，區內人流同消費氣氛唔會差過銅鑼灣一線街，所以佢哋集團早年已密密喺區內搵舖，初步點算，依家喺尖沙咀嘅自置舖大約有近10間。

舖位37年升值160倍

促成交易嘅喜來登旺舖陳志業話，上述漢口道25至29號漢光大廈地下B舖，面積約800方呎，以購入價1.45億元計，呎價只不過18萬多元，相比同區廣東道同海防道依家一線地舖呎價動輒六、七十萬元，上址呎價確係筍。

依家個舖由高爾夫球店以每月約18.3萬元租用，租期一年後到期，估計新租金可升至35萬多元，屆時收租回報近3厘。而原業主早喺一九七五年以約90萬元購入，依家帳面賺1.44億多元，樓價期內飆升約160倍。

事實上，英皇國際早年已看好尖沙咀一線街舖後市，早喺二○○九年一擲約8.43億元，買下同系公司租用嘅廣東道6及8號地舖，以建築面積約1,500方呎計，呎價差唔多56萬元，當時呎價為全港新高。Donald話，日後連同隔籬自置4號舖打通，可以成為一個2,000多方呎三相連舖，因此，估計該巨舖現市值起碼值30億元。據悉，同區諾士佛臺一個地下單號舖以1億元賣咗，呎價5.5萬多元，收租回報近2.5厘。

趁旺出貨逾億大刁增

樓市氣氛旺，業主都趁機出貨，高力國際譚蔭培話，安全貨倉（00237）或有關公司嘅葵涌國瑞路132至140號安全貨倉全幢依家放盤，市場料成交價可達12億元，呎價折合約2,900元。第一太平戴維斯袁志光話，市旺下，佢哋公司投資部今年頭九個月嘅促成逾億元大刁涉資約160億元，估計期內營業額已多過舊年。