股海實戰：騰訊繼續跑贏大市

尋日港股成交縮減至只有397億元，一如所料，喺A股勢弱、本港期指結算、基金季結以及長假當前，投資者入市態度審慎。內地住房部重申地方政府須嚴格執行房產限購措施，雅居樂（03383）跌4%，恒大（03333）跌1%；反而建材股卻逆市做好，早前提及可博反彈嘅中材（01893），尋日曾高見2.32元，一路無緣上車嘅中國建築（03311），經已升到上接近9元，想追落後可以(目及)實金隅（02009）。

過去A股瘋炒，係靠內銀同內房雙響炮，但如今內房同內銀股都失去動力，呢個局面唔改，A股復甦之日仍然無期。為咗平衡市場風險，培育魚缸新力量，呢幾年中央一路都話要支持戰略性新興產業發展，近日國務院印發《關於深化科技體制改革及加快國家創新體系建設的意見》，主要係推動資金市場開方便門，配合科技作為戰略性新興產業嘅發展步伐，範圍包括節能環保、新一代訊息技術、生物、高端裝備製造、新能源、新材料、新能源汽車等等。

共贏基金收成可期

尋日炒家藉上述消息追入科網股，網龍（00777）股價創8.9元新高，收報8.61元，升4.49%，金山軟件（03888）及金蝶（00268）分別升6%及3%。其實論新興企業龍頭，股王騰訊（00700）當之無愧，去年初公司成立為數50億元人仔嘅產業共贏基金，為互聯網及相關行業嘅優秀企業提供資本支持。以目前騰訊4,000多億元市值，年賺逾百億人仔，有條件作出呢項風險投資，加上政府加大扶持力度，相信長遠呢項投資收成可期。

講番騰訊本身嘅互聯網及流動通訊核心業務，受傳統經濟周期表現影響相對細。今年上半年公司收入同比增長54%，純利增15.9%至60.49億元人仔。隨着未來兩年內地將推出4G，流動通訊數據傳輸速度將進一步提升，用戶資費可進一步降低，而提供互聯網、移動及電訊增值服務嘅騰訊，就幾可肯定會係得益者。

今年騰訊股價由156.1元起步升到上本月高位260.1元，足足升咗成舊水有多，跑贏大市，挑戰大笨象（00005）喺散戶心目中嘅超級地位，未來有條件繼續做魚缸嘅「長勝將軍」，順勢而為無謂估頂，主要風險因素包括內地收緊互聯網市場監管。