牛熊對壘：樓市升溫吼新地20081

港股二萬一點前牛皮整固，上周炒上落，唔易捉路，佔恒指成分較重的多隻重磅股較強勢，阻力位前稍休後又再起動。有人話九月份是QE蜜月期，不排除牛皮過後，可輕而易舉地衝上二萬一關口，散戶亦明顯願意持有牛證，恒牛總街貨34.28億份，單日增逾3億份，同日熊證總街貨20.58億份。

中移輪續獲追捧

今次由月初見底開始的升浪，持熊證的淡友被殺個片甲不留，期間曾不斷補貨入熊證博調整，但當恒指升到現水平，反見補倉的意欲不大，反映市場大部分散戶傾向相信大市會再升。熊證重貨區介乎20,900至21,399點之間，首度防線只跟現水平差百多點，涉及14億份街貨。

上周五共15隻熊證被強制收回，當中14隻是恒指熊仔，牛熊證成交大跌，僅39.7億元，只及周四成交的六；窩輪成交亦跌約一成半，錄得62.2億元，金額跑贏牛熊多個身位。大家的焦點放在個別炒得熱烈的個股身上，中移（00941）上客數據出乎意料地好過預期，終於打低對手聯通（00762），股價衝上85元樓上，繼續蟬聯最活躍個股輪。

有大行最近出報告唱淡，話滬綜指仲有得跌，咁悲？是否要先挫低股市，待十八大新領導上場，股市揚升來個贈興，真係不得而知。不過，呢排有輪商推介安碩A50（02823）的Put輪來應景，大家自行判斷，依家開Put值唔值博。

直至經濟好轉先會停的美國QE3，對經濟的真正威力如何仲未知，樓市的恐慌搶購潮卻又升溫。據聞地產經紀呢排做得最多的是鼓其三寸不爛之舌，力說業主賣樓，因市場好缺貨，買家又肯追價入，仲話終於重見九七回歸前的瘋狂。發展商推新盤亦傳快速去貨，仍然有點落後的地產股，可繼續睇好。新地（00016）上周於115元前回頭，可再發力，新地花旗購（20081）今年十二月二十四日到期，行使價112.8元，實際槓桿13倍。