樓市出更：老街變潮租金「食」住上

近年荃灣轉變大，不少舊樓重建為新型商廈、商場、酒店及住宅，成個區逐漸煥然一新，吸引消費力強嘅年輕族進駐；鄰近萬景峯嘅荃興徑，由原先主要售賣民生用品街道，變身為食街，帶動租金向上，依家平均呎租約400元，按年升三成。

自從西鐵通車之後，荃灣消費重心轉咗去荃灣廣場同荃新天地一帶，而受惠嘅街道包括屬於步行街嘅荃興徑，所以吸引唔少主攻年輕高消費族群嘅商戶租舖，依家條街賣嘅嘢食國際化，一般日、台、韓、泰外，仲有山西刀削麵，佢哋都係承租能力較強嘅租戶，扯高成條街租金，依家平均呎租大約400元，按年高咗三成左右。

逾六成舖經營食肆

有代理同劉Sir講，成條荃興徑大約有25間舖，多年前條街嘅商戶都係賣民生嘢多，包括有CD舖、租書舖、裝修同髮型屋，但係依家食肆餐飲呢類商戶數數埋埋已經增加到16間，佔成條街商戶比例超過六成。至於以前啲舖頭租客，好多都已經冇做，或者「上樓」租用附近如海壩街樓上舖，事關租金起碼平一半。

畀得起租嘅新式食肆都睇好荃興徑，積極搶租龍頭舖，其中有間專造特色西餅同埋蛋糕嘅連鎖店，早前租咗呢度一個雙號單邊地舖作首間分店；代理話個舖面積200方呎，估計市值月租10萬元，呎租500元，同之前比高咗30%。

另外幾年前曾租用同區大河道一個商場全層嘅吉字頭日式連鎖食店，年前都轉租荃興徑13至23號地下部分同埋樓上1樓，月租大約21萬元。

舊商戶憂大幅加租

面對荃興徑近幾年有唔少外來新食店進駐，喺度開業近四十年嘅冰室老闆方先生無奈咁話：「時代變遷下，依家啲人少咗去舊式茶餐廳幫襯，佢哋大部分食客都係多年老街坊，月租大約十幾萬元，如果業主大幅加租，生意就會百上加斤。」

開業三十多年嘅精品文具商戶負責人周小姐同劉Sir講，「依家貨品來貨價貴，租金高，幸好附近有間大型酒店，有時有啲內地旅客嚟買高價玩具。」