Fundman睇市：內房股降溫

歐美央行之後，日本央行加入放水，尋日宣布把70萬億日圓買債計劃，加碼至80萬億日圓。消息為早市牛皮的港股帶來刺激，午後更愈升愈有，重返五月初水平，恒指埋單升239點。

名列內地十大地產商的招商地產及深圳萬科，今年較早時間分別入主香港上市的東力（00978）及南聯地產（01036），另一間「十大」金地集團，去年未能成功收購至祥（00112），今年捲土重來，睇中新加坡星獅集團旗下的星獅地產（00535），沉寂多時的殼股潮有鹹魚翻生迹象。

唔少人認為，內地大型地產商來港借殼，目的是為拓闊融資平台，為未來降低借貸成本鋪路。筆者認為，這可能只是買殼原因之一而非全部。事實上，論融資能力，僅得A股上市的金地，不見得比香港上市內房股如雅居樂（03383）、富力（02777）輸蝕。睇番七月金地在港發行的一五年到期點心債券，愈升愈有，到期息率降至7.4厘發行以來最低。

再講深圳萬科，單是上個月，單單一個月的賣樓量已達到113.5億元人民幣（約139億港元），等於新地（00016）一二年財政年度全年370億售樓收入三分之一以上，有云大雞唔食細米，來港買殼，與幾間寡頭壟斷的地產商作正面博弈，除了政治因素外，史提芬實在想不到更有可能的動機。

龍湖失守配股價

八月份內地70大城市，有36個房價按月錄得升幅，比七月的50個少，市場憧憬金九銀十賣樓旺季，不過，已多次傳要伸手的龍湖（00960），急不及待集資31億元。比較意外的是，雖然承銷商前日話去貨情況理想，加埋有8%折讓，但尋日大升市竟然連配售價11.88元都守唔住，收11.78元。

睇見星展份報告幾有趣，估吓內房中邊個會係下一個伸手，設定的五個條件，包括今年股價跑贏同業、較高負債比率、市帳率高於或接近一倍、鎖定售樓佔全年銷售目標較低，以及有計劃增加較多土儲的，結果選出世房（00813）、潤地（01109）、合景泰富（01813）、龍湖、碧桂園（02007）、保利（00119）及雅居樂。

名單之中，龍湖、碧桂園已經搞掂；世房年初至今預售超勁，令批股機會降低；潤地母公司傾向注資多於集資買地；合景泰富及雅居樂管理層又否認有集資計劃。不過該行重申，市場重估這批內房股時，始終不能排除溢價集資減債的可能性，而龍湖意外的伸手，勢必令短期幾隻跑贏股份降一降溫咁話。