股海實戰：中國遠洋超賣反彈

日本放水提振亞洲股市，恒指尋日埋單計升239點，收報20,841點。短期大市仍圍繞全球放水呢個主題，至於升勢能否持久，就要睇嚟緊市場流動性係咪真係有實際改善。

昆侖能源（00135）董事減持，理由係償還個人債務，解釋得咁詳細，相信係怕被誤為睇淡公司前景，尋日股價未有異樣，收報13.7元﹐升0.5%。先前講到會睇位落車嘅海通證券（06837），尋日高位見9.29元，遂以平均價9.26元沽出，計埋早前低位炒咗一轉，當打個和！

呢期幾隻殼股瘋炒，炒風並已蔓延至其他細價股，好似隻出咗名難炒嘅時富金融（00510），尋日高開見0.1元後，五分鐘已經見全日高位0.138元，之後倒轉炒落，收報0.107元。若然尋日晨早先趁熱鬧上車炒即日鮮，多半要放低學費！所以阿莊都係寧願齋睇。

內地外貿形勢嚴峻，再唔做嘢全年出口增長難以保十。消息指國務院落實促進外貿措施，商務部亦證實短期會推穩定外貿增長政策。出口股有動靜，其一係中國遠洋（01919），本月初股價曾低見2.75元，14日RSI落到21，喺極度超賣之下，上周五開始有異動，本周一炒上3.22元遇阻回落，尋日又藉好消息翻炒，高位見3.27元，收報3.25元，升9.4%。

憧憬穩外貿政策出台

老實講，以中國遠洋主要做集裝箱及乾散貨運輸，目前行業指標BDI仍處低位，尚未見到有大起色，而公司上半年虧損超乎市場預期，全年業績幾可肯定係「杰撻撻」。依家股價炒上，唯一動機係炒現價經已頗大程度反映最壞情況，隨着各國放水，環球經濟有喘息機會，加埋阿爺出手促外貿，為第四季回順注入動力。

再睇中遠洋嘅股價，○八年最差嘅時候曾低見2.55元，去年最低位喺2.8元，本月初落到2.75元觸發反彈，交投有改善，且看短線能否企穩50日線3.22元樓上，下一阻力位睇上月高位3.59元，再次跌穿10日線2.97元，就疊埋心水等試○八年低位先再睇。