樓市出更：黃大仙樓派卡片到簽完 搶盤鬥極速

QE3一出，樓市即被推上另一高峰，買家抱住「早買早享受，遲買無折頭」嘅想法，為二手市場締造唔少「極速」傳說；黃大仙新光中心無裝修單位，買家第一次睇樓，包埋同業主傾，用咗約十五分鐘就決定購入，計埋草擬合約同簽約，只係用咗四十五分鐘，代理話係入行首見極速成交。

世紀21置業薈點陳振文同劉Sir講，前晚約咗個客睇新光中心1座中層B室，面積約502方呎，無乜裝修，睇咗五分鐘個客即拉埋業主自己傾，傾咗十分鐘，見業主肯減價4萬元，即以約304萬元入市，呎價約6,056元，由睇樓到決定買只係用咗約十五分鐘，計埋草擬合約同簽約，都係用咗四十五分鐘，都咪話唔極速。

陳氏又話，其實嗰晚都係第一次見個客，由派卡片到簽單後握手，都唔使四十五分鐘，做咁耐都未試過咁快開單；而個客見單位屬單邊坐向，加埋見到附近居屋龍蟠苑個價都升到三百幾萬元，所以咁快入市。

公屋客兩小時買嘉湖

鄰區慈雲山單幢樓永發大廈，喺缺盤下都錄「極速」成交，世紀21富山黃澤龍話，該物業高層8室，面積345方呎，買家都係睇樓一日，深知細價樓渴市，即用200萬元買咗個單位，呎價5,797元。

樓價升得急，買家怕遲買更貴，好多因而加快入市，祥益黃肇雯都講，有個本身住公屋嘅客，原意係買居屋，但見天水圍天盛苑樓價都拍得住私樓嘉湖山莊，加上第時流轉量高，前日先至第一次睇樓，兩小時內即決定落訂，以約300萬元買嘉湖山莊翠湖居2座中層G室，個單位面積約705方呎，呎價4,255元。

彩蒲苑呎售逾四千五

事實上，只要有盤，唔理幾錢，買家諗吓即搶，金龍地產陳美寶就話，上水居屋彩蒲苑D座高層面積484方呎單位，買家睇咗兩次之後，即以221萬元買入，呎價4,566元，創下屋苑呎價新高。

相反，有個已經睇樓成年嘅買家，都趕住買樓。香港置業鄭智恒話，有個外區客睇樓一年多，成日期望跌市先入市，但見個市不跌反升，近日終以約872萬元購入大角咀奧運站維港灣1座高層A室。