市場徐想：地產股長線買得過
伯南克一招無限期QE，令到所有地產、商品股彈到飛起。真係學《西遊記》嘅星爺話齋，如果要為呢個QE3加一個期限，Prof. J相信會係一萬年。
有朋友問依家仲應唔應該買樓？夠錢畀首期、供得起就買啦。但係有啲朋友真係未準備好，買住地產股先又好唔好呢？買磚頭同買地產股最大分別係前者直接買有形資產，等佢升值；而後者就只係買間上市公司，但股價同樓價未必100%掛鈎。但買地產股入場費低、流通性高、現時估值偏低、交易又唔受政府措施影響。只要間地產公司唔係玩財技，而公司土地儲備足夠、市帳率低，都不妨買番啲作長線投資。