股海實戰：創科續有上升空間

尋日港股高開逾百點，本來若然外圍配合，唔難更上層樓，偏偏A股滬綜指跌逾2%，搞到港股亦一度倒跌，埋單恒指僅升28點，收報20,658點，成交605億元。內地光伏業繼遭美國及歐洲圍攻之後，印度又加多一腳，更甚者係近日美國總統奧巴馬為咗拉票，話擬對內地汽車業非法補助告上世貿。總而言之，今年國際形勢複雜，貿易糾紛、南海問題，好多事端都衝着中國而來，至少喺十一月美國總統選舉完結前，都難有安寧！

中國企業面對內部需求增長放緩，開拓海外市場又阻力重重，挑戰前所未有，所以投資者亦唔能夠一本通書睇到老，宜因應客觀環境變化，持審慎態度看待中企股，再期望凡「中」字股皆升乃不切實際。回說A股，呢期走勢陰陽怪氣，聽中國通話，十八大前咩都可以發生。針對組合持股，正考慮沽出海通證券（06837）。

提防資金炒高商品

尋日同一位從事電子業嘅廠家食飯，問佢第四季海外訂單情況如何。聽佢講近兩年環球經濟走下坡，海外市場旺季因素已淡化，節日效應已大不如前，八月份訂單雖較次季略佳，但仍未睇通未來幾個月嘅形勢，且須留意QE3之下，會否導致資金流入狂炒商品市場，一旦貴金屬價格飆升，就真係衰多幾錢重咁話！

講到QE3，今次伯老出招高明之處，在於叫人估唔到佢下一招幾時出同係咩之外，嚟緊聯儲局唔係買國債，而係每日買按揭抵押債券，直至就業市場有改善為止。好明顯，美國想藉支持物業市場，由資產價格上升帶動就業市場改善，以推動個人消費及企業借貸，呢一招可謂搔在癢處！美國樓市有國策支持，要搵受惠股，主攻北美洲電動工具及地板護理及器具業務嘅創科（00669），應該夠晒資格。

憑藉積極開拓新產品，創科嘅經營表現理想，今年上半年賺9,600萬美元，同比增長兩成，銷售額及盈利均創新高，中期息增加35%，負債比率由66%降至37%。上月初，創科股東曾配售舊股，但未見其股價大回。以尋日收市價13.48元計，已較配股價累升四成，強勢畢現，接貨者贏到開巷。

以現價計，今年預測市盈率都係14倍左近，而受惠美國QE3，相信一三及一四年度盈利表現可看高一線，估值尚有上調空間。只係呢個幾月股價真係升得幾狂野，14日RSI飆到上80，短線回吐在所難免，可觀望12至12.5元承接，穩守其上才考慮下注，下一浪阻力喺15元，不跌穿11元可繼續持有，其中一項風險因素乃美國總統大選後貨幣政策可能有變。