魚缸Blogger：華晨搭轉順風車
伯老今次嚟真唔再出口術，QE3一開大，成個魚缸即刻生猛晒，上周五汽車股板塊全線報捷，其中華晨汽車（01114）同廣汽集團（02238）表現就相當靚仔，分別升近9%同7%，不妨食住條水搭一轉順風車。
早前因為母公司大手減持，華晨股價一度急跌，但睇嚟已經反映得七七八八，加上主打品牌寶馬嘅合營銷量持續高增長，今年頭六個月激增逾四成半，內地汽車銷量前十嘅華晨，今年有條件跑贏整體低迷嘅車市。至於中日合資嘅廣汽，短期銷量話唔定會受近日政治情緒影響，華晨可以乘機抽水搶市佔率。受大市氣氛帶動，華晨股價收復10日、20日同100日多條平均線，不妨候低喺7.4元附近上車，阻力上移至8.48元。
華晨汽車（01114）
阻力位：8.48元
支持位：7.00元