股海實戰：江西銅業轉勢大翻身

美國總統選舉前夕，聯儲局一如預期推QE3，但今次特點係無限量兼無限期，好明顯係不惜代價出盡全力為奧巴馬連任造勢。上周五港股急升逾500點，恒指抽穿20,600點水平，熊屍遍野，大市成交額增至接近800億元。

誠如阿莊上周所講，一旦確認再開印炒機，金價會發癲，上周五金礦股如狂牛，招金（01818）、紫金（02899）、中國黃金（02099）及靈寶黃金（03330）升9至15%，其中阿莊多次話係金礦股首選嘅招金走勢最強，升15%。阿莊估計，嚟緊金價好大機會破頂，但破頂嗰吓可能會引發一輪調整，但大方向依然係睇升，明年金價見每安士2,000美元嘅說法唔流得晒！

美國經濟難樂觀

各國放水，資源價格勢必喺炒風轉烈下走高，但環球經濟復甦動力仍然疲弱，資源漲價對經濟可以話有害冇利。事實上，低息環境不斷延長，意味美國經濟真係衰到貼地，諗到呢一點，阿莊都有啲心寒！呢場危機演變落去會係點，真係唔敢想，但一樣嘢可以好肯定，就係「覆巢之下，豈有完卵」，所以都唔驚得咁多，有飯就食，有錢就搵，反正一旦泡沫爆破，唔會有人留低，一於本死冇大害！

講到資源價格，靜咗好耐嘅江西銅業（00358）上星期明顯大挾淡倉，周五股價高開見19元後，抽到上全日高位19.8元，收報19.72元，升8.2%，成交達10.5億元，以成交股數5,395萬股計，乃去年十月二十八日以來新高。

江銅今年中績純利倒退喺預期之內，現價亦已反映第三季市況不濟。展望末季，歐、美放水，加上踏入季節性旺季，銅價看升動力正在增強。事實上，喺公布中績後，大行對江銅嘅評價唔再口淡淡，好似大摩就話，內地銅需求有改善迹象，加上內地亦進行預調微調，銅價有望跑贏其他金屬價格，故將江銅嘅評級上調至「增持」，目標價由19.5元上調至22元。

睇番江銅股價走勢，自去年八月失守250日線以來，未曾一次真正能收復此位，直至上周股價連續五個交易日站喺250日線（現處17.85元）之上，周五大陽燭更拋離該線。由於14日RSI已抽上70樓上，短線出現調整唔出奇，但只要站穩250日線樓上，可確認轉勢，末季目標上試首季高位22.7元。