投資SUN國度：REITs穩陣抗通脹
一聽到QE3，對於甚麼執行細節，經濟會否有實效等等，一般人興趣都不大，只覺得又被伯南克搵笨，令手上現金貶值，被迫再打一場身家保衞戰。
化繁為簡，人棄我取，趁機再買REITs及防守股。上周五大市勁升，基金經理為追回報而更換，令上述股份反而受壓，正是買貨收息的良機。當然不是零風險，但買金何嘗是必勝？上兩次QE期間金價一樣飄上飄落，如對比長期表現，REITs仍然跑贏。貴金屬無息收是死穴，而REITs物業組合分散，只要經濟環境不太差，收益率上升拍得住通脹並不難，在錢唔係錢的年代，可望再上一層樓。