樓市出更：將軍澳地海景大晒

屬新發展區的將軍澳南，至今已售出多幅地皮，而即將喺今個禮拜截標嘅第66C2區限量地皮，係區內首幅推出嘅臨海地，市場估計幅地每方呎樓面地價由4,500至4,600元，比之前賣出嘅同區限量地，高近15%至超過17%，成交價高逾22億元。

呢幅臨海限量地可以起到接近49萬方呎樓面，但規定要提供由520至546伙，原來將軍澳南已經係第6次推地，而由於呢次係首推臨海地，地皮前面再無遮擋，相信會有好多發展商去爭，其中包括已响區內「插旗」嘅發展商。

新地嘉華料再競投

好似已經動用超過75億元喺將軍澳南買咗3幅地嘅新地（00016），睇怕都一定會出手爭奪呢幅臨海靚地，事關佢哋今年五月份買入嘅第66C1區地皮，就係貼住嚟緊截標嘅66C2區地皮，想要景觀有保證，最穩陣就係攞埋呢幅地。

除咗新地，啱啱喺上個月用咗約莫11億7千萬元，買咗斜對面嘅第66D1區地皮嘅嘉華國際（00173）亦不容忽視，佢哋幾乎次次都有投將軍澳南地皮，相信今次應該都唔會甩拖。至於一月份投得將軍澳第66B2區地皮嘅會德豐（00020），估計對呢幅臨海地都幾有興趣。

坪洲賣地或掀激搶

測量界朋友同劉Sir講，截標嘅第66C2區地皮成交價最高可以做到逾22億元，呎價約4,500至4,600元，有望追到新地一○年投到嘅第66B1區地皮，嗰幅地係無限量條款規定，當年呎價做到逾4,600元。至於同日截標嘅坪洲東灣B地盤住宅地，可以起到樓面有一萬四千方呎，市場估值由2,000至2,300萬，呎價由近1,400去到約1,600元，唔知幅地有無機會好似隔籬A地盤咁，吸引逾30個財團入標。

其實，有財團响今年以樓面地價每方呎唔夠600元勾出坪洲東灣A地盤，成功吸引30個財團入標，成為政府歷年招標出售地皮反應最好嘅一次，最後地皮以約1,500萬元賣咗，呎價逾1,600元。