投資SUN角度：公司抽水見招拆招

美國推出第三輪量化寬鬆（QE3），每月購買400億美元按揭擔保證券（MBS），直至就業明顯改善為止。這個旨在支持美國仍然疲弱的樓市，有金額、無時限的措施，帶動上周五港股急升582點，主板成交增至791億元。

聯儲局同時維持低息環境至一五年，包括股市在內的風險資產市場氣氛回暖，低殘股強勁反彈。正正是追又唔係，唔追又唔係的時候，驟見配股潮殺到，多隻股份乘機「抽水」。QE3前抽水已經咁多，依家個市終突破悶局，估計將有更多抽水活動，為求自保，大家要睇清睇楚。

九月份的兩個多星期，先後有建行（00939）、友邦（01299）、東航（00670）及太保（02601）等配股，共抽走約350億元。據過往經驗，每逢遇上「抽水狂潮」，股市都會受壓。然而，今非昔比，近期個別的抽水動作不但未對股價構成壓力，更減少了股份不明朗因素。

每當遇上大牛市，公司以高股價配股，資金又用得其所，都無可厚非，但若在股價好低時，仍勉強要抽水，背後動機真的值得商榷。當然，抽水行動其實都走不出幾大板斧，只要拆解得宜，分清抽水動機，走為上着還是揸住等收成，不可一概而論，投資者動作夠快，策略定得啱一樣做到趨吉而避凶，減低損失，放大利潤。

大股東接貨更利好

東航上周公布向母公司配售A股及H股，共集資44億元，用以償還貸款，改善負債比率，用途看似平凡，但公司的資產負債表好睇咗，母公司變相增資，一舉兩得。該股上周三復牌一度升近7%，收市仍進帳約5%。其實，公司上市就是為集資，首次公開集資是新股的IPO，其後的集資就是被稱為二級市場的配股，是股票市場正常不過的行為，最緊要是集資用途對公司前景有無好處。

公司或股東進行配股，接貨的若是大股東，一般被視為對前景睇好，肯繼續注資加碼的表現，衰極有限。若接貨的是著名投資者或基金，股份身價更隨時三級跳，如○八年九月比亞迪（01211）獲股神巴菲特的投資旗艦巴郡，以每股8元認購了2.25億股H股，股份從此貼金，○九年最高升至88元，較股神入股價高出九倍。

要維持大股東地位，必須維持一定的持股量，減持太多或全部減持，帶來的變化當然巨大。如大股東配售套現，持股量減低，或多或少都對前景有保留。除非大股東變相賣殼，這類殼股近日又再炒起。遇上這類「配股」活動恍如一個突來的中獎機會，當然唔使走貨。如南聯地產（01036）大股東「賣殼」給內地龍頭地產股萬科，一減一加之後，公司換上了規模及名聲都響噹噹的新主，股價唔升都難。

另一類是主要股東及投資者只作部分減持，如友邦遭AIG減持，股價不跌反升，原因是AIG「莫財」，賣股套現是遲早的事，出售反而有助消化不明朗因素。