股海實戰：港鐵追落後有理

恒指尋日低開69點後反覆偏軟，兩點半過後喺中海油（00883）及本地地產股帶動下止跌回升，最終收報19,857點，升30點，成交回落至445億元。短期投資者焦點放喺德國法院判決，如今市場對美國推QE3期望甚高，客觀上奧巴馬要爭取連任總統，點都要做番啲嘢，一旦確認再開印鈔機，金價可能會再發癲，揸住金礦股或黃金ETF者，睇吓呢舖爆棚叫唔叫得成！

內地八月份新增貸款數字勝預期，存款流失情況亦見改善。不過，消息對內銀股刺激作用不大，主要係呢期內銀股稍為做好啲，班大戶又極速配股抽水，咁叫班缸邊友點放心跟炒？聽表叔話，近日內地政局傳聞多多，其中一個消息話，十八大擬定於十月中旬召開，若然會期底定，料有助去除不明朗因素。

中企殼股博注資

尋日見到三隻中企殼股異動，所講嘅係中糧香港入主嘅僑福（00207）、招商地產入主嘅東力（00978）以及萬科入主嘅南聯（01036），股價分別升24%、8%及5%。中企喺香港買入殼股，無非係想利用香港股市融資平台，建立多一個籌集資金渠道，故憧憬殼股獲注資亦係順理成章，只係策略上宜細細注買落，放埋一邊長線釣大魚。

特區政府推出嘅穩定樓市措施已被定性為遠水難救近火，樓價同地主股股價一樣已無後顧之憂，恒地（00012）股價尋日創五十二周新高。等同半隻地產股嘅港鐵（00066）呢排亦好似食咗大力菜，連日走高，尋日曾高見28.7元，乃去年六月初以來新高。

港鐵嘅鐵路運輸業務收入穩定，一四年開始至二○年，將有多條新幹線投入服務，市佔率可望進一步提升。不過，講到要喺中短期推動股價表現嘅因素，都係來自地產方面嘅消息。如今樓價大跌可能性可排除，氣氛利好港鐵嘅上蓋物業招標，物業發展收益前景能見度回升，股價發力追落後不無道理。雖然技術上，14日RSI已抽升至超買區，但短線回吐守穩28元嘅話，照計仲有得上，下一個較大嘅阻力區喺30至32元，50日線支持喺27.38元。