樓市出更：「舖王」走貨袋億二

近排商舖大手買賣成交旺番，唔少舖壇投資老手都伺機出貨獲利離場；「舖王」鄧成波（波叔）就剛以近5.3億元沽咗金鐘力寶中心一批共兩萬幾方呎樓面嘅舖，批舖揸咗近兩年，帳面袋逾1.2億元。

劉Sir同波叔傾開偈，佢話金鐘零售商舖一向求過於供，所以兩年前好快就拍板決定向銀行買入力寶中心1樓4號舖同埋閣樓等一批舖位，樓面合共約2.5萬方呎，當時購入價只係約4.08億元，而呢批舖位啱啱成功以約5.29億元轉售，劉Sir計番，批舖成交呎價約2.1萬元，兩年升值近三成，市傳買家為胡姓投資者。

長沙灣舖3日賺550萬

此外，一位張姓投資者就頻頻換貨，火速喺三日內「摸出」長沙灣順寧道26至36號地下其中5個舖，三日內帳面賺550萬元；另外佢亦買咗大角咀埃華街67至87號地下3A舖及1樓等樓面，涉資約1.243億元，呎價約9,500多元，依家已經有間酒樓洽租，佢同時又想分間上址成為3個舖，若成功售出，可套現約1.8億元。

另一資深投資者李耀華舊年年初亦以超過1億元，買入荃灣大河道與海壩街附近一個巨舖，並分成五個舖出租，其中一間租畀餐廳嘅地舖以7,900萬元賣咗。

投資者一星期2億掃舖

此外，中原陳偉材亦話，投資者林子峰一周內斥約2億元掃幾個舖，其中啱啱買入嘅灣仔菲林明道7號地下3至4號舖連閣樓部分，涉資約6,600萬元。

另有代理報料，中環畢打街有個找換店租緊嘅舖，獲出價約7,200萬元洽購，呎價超過24萬元，若成交屬實，將是區內新指標，而原業主半年帳面袋700萬元，賺幅逾11%。

至於商廈市場，美聯商業郭漢釗報料，紀惠集團廖偉麟再售出上環信德中心西翼31樓01至02室及03至05室，連同日前售出嘅同廈單位，涉資共約2.16億元，一年多帳面勁賺6,500萬元。

近年新式工廈新盤搶手，其中興勝創建（00896）發展嘅大角咀必發道工廈THE BEDFORD，暫有2伙中層單位獲買家以呎價約6,000元洽購，加埋逾3,600萬元，勢創區內呎價新高。