Fundman睇市：人仔匯價穩步回升 南航可投機

歐央行無限買債餘威未盡，港股升25點，報19,827點；中國公布八月份出口升2.7%，進口跌2.6%，兩個數字都比預期差，分析員解讀成內地經濟持續疲弱的負面訊號，尤其剔除農曆年假因素，進口是○九年十月以來首次出現按月倒退，由於進口貨品不少屬於加工後再出口的原料，數字意味在未來幾個月，內地出口恐怕都難以見到改善，近大半年A股持續弱勢，果然事出有因。

亦因為進出口數字麻麻，八月內地貿易順差，由251億美元擴大到266億美元，比分析員估計的195億美元高出近三成六，人民幣兌美元恍似矮仔上樓梯，返到6.3377見六月至今高位，一些受惠強人仔的，例如航空股，不妨短期望多兩眼，其中市帳率最低、預期下半年業績會有反彈的南航（01055），有投機買入條件。

望到頸都長，內地救經濟措施終於有點眉目，發改委批出多個城市軌道交通建設規劃，涉及深圳、廣州、蘇州等地區，估計投資額8,000億元（人民幣．下同），同○九年四萬億的救市有分別，今次中央透過發改委，集中投放軌道交通投資，近期表現每況愈下的出口及內需，仲未輪到。

上星期，AIG減持5.919億股友邦（01299），套現156億元（港元．下同），配售時間揀喺歐央行議息及公布OMT無限量買債前夕，在下當時還開玩笑話接貨的肯定膽生毛，點知又錯過一次撈魚機會，輾轉兩日，友邦股價已經升番上28.15元，26.5元接貨者，帳面已贏6.2%。回想近三個月，筆者最滿意一項投資正是五月，個個以為股市世界末日，趁基金股東減持買下領匯（00823），居然無學精到，真係唔抵。

冇買友邦嘆走寶

股神巴菲特講過，股東減持唔代表一定看淡，金句在莫財的AIG身上，就更加啱用，一到禁售期即沽，明顯不是為淡而沽。睇番友邦股價，由三月份開始橫行，困守在24.05至28.65元之間，落實減持反而股價連飆兩日，可見等機會買的，明顯比等機會沽貨的大孖沙多。

綜合大行預測，友邦也是部分能夠在一二至一四年的艱難經營環境下，保持增長的保險公司，預測今、明兩年盈利增長能達到10及15%。由上半年賺14.44億美元，比預測高出近17%的佳績，全年業績預測數字看來有再一次超越的可能，如果股價回到27至28元，上星期走雞的不妨諗諗佢。