股海實戰：金隅走勢回勇可小注

經上周五急彈後，尋日港股以整固為主，恒指喺19,800點水平現支持，大市成交額589億元，其中92億元來自有配股上板嘅建行（00939）。呢期大市抽升，班大孖沙就趁機大手減持股份套現，究竟呢個係咪好現象，阿莊亦搞唔清，反正有買有賣先至成交到，最終誰是贏家、誰是輸家，就要放長雙眼等着！

內地最近公布嘅經濟數據基本上都喺市場預期之內，阿莊認識嘅中國通都普遍認為，喺十八大前，除非有突發事件出現，否則按照目前嘅經濟運行狀況，再有大動作嘅可能性唔大，來來去去都係擠牙膏式重申「十二五」規劃產業政策同加快大型項目審批，一切出於經濟下行風險增加下起「維穩」作用，尚未談得上帶動「復甦」﹗

游資炒起電訊設備股

尋日幾隻中資電訊設備股有異動，其中傳聞獲新訂單嘅中興通訊（00763）股價升6%，另中國無線（02369）同京信通信（02342）分別升10%及13.9%，且交投活躍，但相信不過係游資輪流翻炒不同板塊，多於行業有實際利好消息提振有關。想發掘下一個炒作焦點，建議吼實低迷嘅新能源板塊。

尋日基建股有回吐，但個別水泥股表現仍勇，如海螺（00914）升3%，金隅（02009）則升5%。金隅兼營水泥、新型建材、房地產開發及物業投資及管理業務，受到房市調控政策持續影響，今年上半年水泥業務收入倒退，但其他業務仍錄得增長；中期純利13.87億人仔，同比倒退15.2%。

隨着發改委提速審批大型項目，末季前水泥價格有望觸底回穩。另外，公司擬於下月召開股東會審議發行不超過76億元人仔嘅短期融資券議案，若然順利通過，相信公司會把握房市調整出手低吸土地儲備。

再睇股價走勢，由今年二月高位8.35元反覆回落至七月低位4.52元，已反映上半年經營困難。近月有回穩迹象，已連現三支陽燭，升穿自二月高位所延伸嘅下降軌阻力，成交配合。短線回吐守穩50日線5.12元，可小注跟進，目標反覆向250日線6元關推進。

順帶一提組合持股，海通證券（06837）尋日高位見9.5元，呢轉上得番50日線9.6元，可再戰上月高位10.34元，否則會考慮宜趁反彈落車，候低再翻兜炒上落。