股海實戰：國美仍有炒上空間

上周歐債發展同美國經濟數據均利好股市表現，加上A股大反彈，港股得以先跌後回升，恒指由周四低位19,209點，反彈上翌日高位19,829點，高低位波幅有成620點，總算打破悶局。以上周五大市成交933億元計，扣除友邦（01299）、太保（02601）及中信証券（06030）配股上板，大市實際成交仍逾730億元。只係眼見個市稍為好啲就咁多大戶配股抽水，對後市仍須持審慎態度。

阿爺發功，發改委兩日內批覆六十個項目，涉及總投資額超過一萬億元人仔。傳聞相關部委短期內更會針對外貿推出新措施，包括可能提高個別行業出口退稅率，可見面對經濟下行風險不斷增加，阿爺毫不猶豫泵水救市，難怪基建、水泥、鋼材等股份出現大挾倉。

中材話咁快見2元

上周阿莊提及嘅中材（01893），話咁快上番2元樓上，上周五收報2.01元，都算推介合時，而受惠A股升勢，組合持有嘅海通證券（06837）亦重上9元樓上，收報9.04元。

上周五升市，股份升勢頗為全面，連長期積弱的民企股都照樣發力向上，如霸王（01338）升5%、味千（00538）升一成，國美（00493）升8%。

針對電商減價戰，上周發改委開腔話初步調查顯示，電商減價戰涉嫌欺詐，搞到各商戶即刻偃旗息鼓。事實上，由於網購以便捷見稱，客戶忠誠度比傳統零售客戶要低，單靠減價促銷唔係長遠之計，更何況有指部分電商話就話割價，實際上降價幅度不大，加埋有大型家電生產商講明寧願停止供貨都唔會參與做蝕本生意，所以有理由相信，出現非理性嘅電商減價戰可能性已排除。

咁嘅局面，對國美未嘗唔係好事，至少有喘息嘅機會。隨着下半年中央推新嘅家電補貼措施，券商引述美國七、八月份嘅銷售已有所改善，現價已某程度反映拓展網購業務嘅風險，若然嚟緊內地有更多「維穩」措施出台，內需板塊有望撥開雲霧，國美股價尚有炒作空間，下一個較大嘅阻力位喺0.9元，調整宜守0.68元。