樓市出更：財團謀駐「波鞋街」

市建局旺角洗衣街重建項目（俗稱波鞋街）將會喺今個禮拜三截標，不過項目最矜貴嘅商舖部分，該局就要保留一半業權，但劉Sir覺得就算利潤會被攤薄，財團都唔會咁容易放過呢舊「金蛋」，英皇國際（00163）就話，市區「靚舖難求」，所以一定會積極研究入標。

劉Sir知道波鞋街重建項目，商舖樓面嘅價值遠高於項目嘅住宅部分，所以唔少財團都係睇中其商舖價值，但早排市建局喺招標條款上列明發展商同該局會共同擁有商業部分，各佔一半權益，同時規定商舖要出租五年之後先可以轉售，所以之前已經有測量師即時調低項目估值逾三成，依家市場估值約25億至36.1億元。

早前收18意向 英皇研投

不過核心購物區地舖唔係話買就買到，所以財團競投意欲未見降溫，英皇國際執行董事張炳強就同劉Sir講，商業樓面要同市建局共同持有，吸引力或多或少會有影響，不過佢話市區「靚舖難求」，集團梗係會積極研究競投啦。

而項目之前收到18份意向書，除咗長實（00001）、新地（00016）及恒地（00012）呢啲大型發展商外，仲有唔少中小型財團都有遞交發展意向，好似永泰地產（00369）同百利保（00617）等。

另外，項目嘅住宅部分價值就真係相對失色，高緯環球張翹楚話，該區實在「太旺」，嘈音等問題對住宅部分構成影響，所以日後住宅呎價賣到約9,000至1萬元已經相當唔錯，但佢始終認為香港難買舖位，預期入標反應都會熱烈。

重建住宅 中小戶佔半

呢個波鞋街重建項目總樓面大約24萬方呎，發展商要提供290個住宅單位，其中半數規定為實用面積約500方呎或以下嘅中小型單位。

劉Sir仲八到，如果住宅部分售樓收益超過23.8億元，中標財團要按比例同市建局分紅。