魚缸Blogger：中國動向小注投機
美國製造業數據衰到無眼睇，但正因為咁，令下個禮拜伯老宣布推QE3嘅機會增加，今晚七點九會有歐央行嘅議息結果，如果相信趁壞消息入市、好消息出貨嘅市場智慧，今日可能係買貨嘅好時機。
今年股價全程捱打嘅中國動向（03818），尋日除淨股價有異動，逆市抽升3%，成交亦有睇頭，共47球貨係上月二十三日以來新高。雖然睇番中動向嘅基本因素，好似上半年純利減少、存貨壓力未消、內地消費增速放緩咁，都對集團無着數，但正如尋日所講市傳阿爺好快會推出內貿嘅「十二五」規劃，作為體育用品股應該可以掹車邊受惠，博佢唔只得一日貨仔咁短癮，小注投機，抽穿0.81元，下站睇0.88元。
中國動向（03818）
阻力位：0.88元
支持位：0.72元