樓市出更：東九工廈出彩虹

近年好多城中名人都買「磚頭」投資，除商舖同豪宅外，將落成嘅工廈樓花物業，都成為佢哋嘅新寵，其中著名漫畫家馬榮成啱啱用約7,351萬元購觀塘天星中心33及35樓頂層複式工廈樓花單位，由於單位擁維港海景，所以呎價近8,000元，貴絕全港工廈。

政府話要起動九龍東，大家認為樓價仲有得升，具投資價值。中原梁志峰（Philip）報料，馬榮成買咗天星中心頂層複式單位，單位位於33及35樓，面積大約9,246方呎，連同一個約200方呎嘅空中花園平台，呎價大約7,950元。

另外，有代理同劉Sir講，天星中心31及32樓另一複式單位上個月中左右賣咗近7,500萬元，呎價約7,800元，依家馬榮成兩個多星期以更高價刷新全港工廈呎價新紀錄。事實上，馬榮成對優質工廈單位情有獨鍾，聽講佢早前斥約950萬元買入鰂魚涌東港中心一個低層單位，面積約1,600多方呎，呎價近6,000元。

天星全幢速沽 利潤逾倍

天星中心發展商第一集團，其董事霍偉良同劉Sir講，天星中心全幢三個月全數售罄，套現約9億元，邊際利潤逾一倍。

近排市場繼續有持舖多年嘅業主願意割愛出貨。中原陳偉材話，投資者林子峰斥約4,150萬元，買入旺角彌敦道737至741號地下4號舖，原業主約二十年帳面袋約3,480萬元，賺幅逾5倍。

另一余姓新進投資者亦斥約2,038萬元購入北角電氣道160號地下D1號舖，原業主約十四年帳面賺約1,338萬元，賺幅近兩倍。

近排中區寫字樓租戶大執位，有見超甲級商廈租金與甲級商廈拉近，有啲甲廈租戶轉租超甲廈，騰出嘅甲廈樓面因業主求客心切未有加租，反而吸引現租用乙級寫字樓大樓面單位，但決定「減磅」嘅租戶「升呢」預租甲廈單位。

據悉，現租用中環南華大廈中層單位嘅會計師行，預租金鐘美國銀行中心低層單位，新租用面積減半至1,200方呎，月租6萬元，每月租金開支反減38%。